ایشیا کپ: افتتاحی میچ میں افغانستان نے ہانگ کانگ کو شکست دے دی

ٹی20 ایشیا کپ 2025ء کے افتتاحی میچ میں افغانستان نے ہانگ کانگ کو جیت کےلیے189 رنز کا ہدف دیا تھا، ہانگ کانگ کی ٹیم 9 وکٹوں کے نقصان پر 94 رنز پر ڈھیر ہوگئی۔

تفصیلات کے مطابق افغانستان کے کپتان راشد خان نے ٹاس جیت کر پہلے بیٹنگ کا فیصلہ کیا تھا جس کے بعد ان کی ٹیم نے مقررہ 20 اوورز میں 6 وکٹوں پر 188 رنز بنائے۔

افغان کھلاڑی صدیق اللہ اتل 73 رنز کے ساتھ نمایاں رہے جبکہ عظمت اللہ عمرزئی نے 53 رنز بنائے۔ ہانگ کی جانب سے آیوش شکلا اور کنچیت شاہ نے 2،2 کھلاڑیوں کو پویلین کی راہ دکھائی جبکہ عتیق اقبال اور احسان خان نے ایک ایک وکٹ حاصل کی۔

جیت کے لیے 189 رنز کا ہدف کے تعاقب میں ہانگ کانگ کی ٹیم 20 اوورز میں 9 وکٹوں کے نقصان پر محض 94 رنز بناسکی۔ بابر حیات 39 رنز اور یاسم مرتضیٰ 16 بناکر نمایاں اسکورر رہے۔

افغانستان کی جانب سے گلبدن نائب اور فضل الحق فاروقی نے 2،2 وکٹیں حاصل کیں۔

ایشیا کے اس اہم کرکٹ مقابلے میں اس بار مجموعی طور پر 8 ٹیمیں شریک ہیں جو کہ گزشتہ ایڈیشنز کے مقابلے میں ایک قابل ذکر توسیع ہے اور تمام میچز ٹی 20 فارمیٹ میں کھیلے جا رہے ہیں تاکہ ٹیمیں آئندہ 2026 ٹی 20 ورلڈ کپ (بھارت و سری لنکا) کی تیاری کر سکیں۔

یہ بھی پڑھیں: ایشیا کپ شروع، پاکستان بھارت کتنی بار ٹکرائیں گے؟، کون سی ٹیم کب اور کس سے کھیلے گی، مکمل شیڈول جاری