وزیر داخلہ محسن نقوی کا منیٰ میں پاکستانی حجاج کے کیمپس کا دورہ، انتظامات کا جائزہ

وزیر داخلہ محسن نقوی نے منیٰ میں پاکستانی حجاج کرام کے کیمپس کا دورہ کر کے انتظامات اور سہولتوں کا جائزہ لیا۔

محسن نقوی 100 برس کی عمر کے بزرگ حاجی سے خصوصی طور پر ملے اور ان کی خیریت دریافت کی، انہوں نے معمر ترین حاجی کی ہمت کو سراہا۔

اس موقع پر حجاج کرام نے بتایا ہے کہ اس بار انتظامات اچھے ہیں، کچھ مسائل کا سامنا کرنا پڑا لیکن عملے نے بہت تعاون کیا۔

یہ بھی پڑھیں :اذان نے زندگی بدل دی، اطالوی نوجوان مسلمان ہو کر حج کی ادائیگی میں مصروف

محسن نقوی نے وفاقی وزیر مذہبی امور سردار محمد یوسف اور ان کی ٹیم کی محنت کی تعریف کرتے ہوئے کہا کہ ہر حاجی ہمارے لیے بہت خاص ہے، مسائل کے حل کے لیے عملہ موجود ہے۔

انہوں نے کہا کہ سعودی حکومت نے اس بار حجاج کرام کی پاکستان میں امیگریشن کی بہت بڑی سہولت فراہم کی، سعودی عرب کے ولی عہد اور وزارت حج کے خصوصی طور پر شکر گزار ہیں۔

وزیرداخلہ محسن نقوی کا منیٰ میں پاکستانی حجاج کرام کے کیمپس کا تفصیلی معائنہ، رہائش، کھانے پینے اور دیگر سفری سہولیات کا خود مشاہدہ کیا۔ pic.twitter.com/vGDsqHIsP4

— Azaad Urdu (@azaad_urdu) May 26, 2026

واضح رہے کہ دنیا بھر سے آئے تقریباً 20 لاکھ مسلمان اس وقت منیٰ میں موجود ہیں۔پاکستانی عازمینِ حج نے منیٰ میں ظہر اور عصر کی نمازیں ادا کیں،منیٰ سے میدانِ عرفات کی جانب اولین قافلوں کی روانگی سر شام شروع ہو گئی ، آج 9ذوالحج کو عازمینِ حج رکن اعظم وقوفِ عرفات کریں گے ،  ظہر کی نماز سے قبل تمام عازمینِ حج میدانِ عرفات پہنچ جائیں گے۔