وزیراعظم کی جنیوا میں نواز شریف سےملاقات،پاک سعود یہ معاہدے کی تفصیلات سے آگاہ کیا

وزیراعظم شہباز شریف سعودی عرب کا دورہ مکمل کرنے کے بعد برطانیہ پہنچ گئے جہاں وہ سینٹرل لندن میں اپنی رہائش گاہ میں مقیم ہیں۔

قیام کے دوران ان کی ملاقاتیں برطانوی حکام اور پاکستانی بزنس کمیونٹی سے متوقع ہیں جب کہ ہفتے کو وہ اوورسیز پاکستانیز فاؤنڈیشن کی ایک تقریب سے خطاب بھی کریں گے۔

برطانیہ روانگی سے قبل وزیراعظم نے مختصر وقت کے لیے جنیوا میں قیام کیا اور وہاں سابق وزیراعظم نواز شریف کی عیادت کی، ذرائع کے مطابق شہباز شریف نے نواز شریف کو پاک سعودی عرب دفاعی تعاون کے حالیہ معاہدے کی تفصیلات سے بھی آگاہ کیا۔

یہ خبر بھی پڑھیں :وزیراعظم شہباز شریف کی سعودی ولی عہد سے ملاقات، دوطرفہ تعلقات اور اہم امور پر تبادلہ خیال

نواز شریف اس وقت علاج کے سلسلے میں جنیوا میں ہیں لیکن امکان ہے کہ وہ چند روز میں لندن آجائیں گے، وزیراعظم کے ساتھ وفاقی وزرا اسحاق ڈار، خواجہ آصف اور عطا تارڑ بھی لندن میں موجود ہیں۔

برطانیہ کا یہ دورہ مکمل کرنے کے بعد شہباز شریف امریکا جائیں گے جہاں امریکی صدر ڈونلڈ ٹرمپ سے ملاقات کا بھی امکان ظاہر کیا جا رہا ہے۔

اقوام متحدہ میں پاکستان کے مستقل مندوب عاصم افتخار نے اس حوالےسے گفتگو کرتے ہوئے کہا کہ وزیراعظم امریکا کے دورے کے دوران مسئلہ کشمیر، فلسطین اور مشرقِ وسطیٰ کی صورتحال خصوصاً قطر پر ہونے والے حملے پر پاکستان کا مؤقف پیش کریں گے۔

اس موقع پر وزیراعظم اقوام متحدہ کی جنرل اسمبلی سے خطاب کریں گے اور غزہ کی صورتحال پر بلائے گئے خصوصی اجلاس میں بھی شریک ہوں گے۔