گوگل کا نیا اے آئی ٹول “نینو بنانا” واٹس ایپ پر دستیاب، استعمال کرنے کا طریقہ جانئے

گوگل کے جیمینائی ایپ کے تحت تیار کردہ نیا مصنوعی ذہانت پر مبنی ٹول نینو بنانا اب واٹس ایپ پر بھی دستیاب ہے، جس کی مدد سے صارفین اپنی تصاویر کو جدید اے آئی ٹیکنالوجی کے ذریعے مختلف انداز میں ایڈٹ کر سکتے ہیں۔

یہ فیچر پرپلیگزیٹی نامی اے آئی کمپنی کے واٹس ایپ بوٹ کے ذریعے فراہم کیا گیا ہے۔ نینو بنانا، گوگل کے اے آئی ماڈل جیمینائی 2.5 فلیش امیج کا حصہ ہے، جو صارفین کو اپنی تصاویر کو 3ڈی مجسموں، اینیمی یا فلمی کرداروں میں تبدیل کرنے کی سہولت دیتا ہے۔

یہ فیچر سوشل میڈیا پر تیزی سے مقبول ہورہا ہے، جہاں لوگ اپنی تصاویر کو منفرد اسٹائلز میں بدل کر شیئر کر رہے ہیں۔ صارفین واٹس ایپ پر نینو بنانا استعمال کرنے کے لیے پرپلیگزیٹی واٹس ایپ بوٹ سے رابطہ کرتے ہیں، اپنی تصویر اپ لوڈ کرتے ہیں، اے آئی سے مطلوبہ اسٹائل منتخب کرتے ہیں اور چند سیکنڈز میں ایڈٹ شدہ تصویر حاصل کر لیتے ہیں۔

یہ بھی پڑھیں: گوگل پر اربوں ڈالر کا جرمانہ، ٹرمپ کی یورپی یونین کو اقتصادی پابندیوں کی دھمکی

ماہرین کے مطابق یہ ٹول سوشل میڈیا صارفین کے لیے نئی تخلیقی راہیں کھول رہا ہے اور انہیں اپنی صلاحیتیں منفرد انداز میں ظاہر کرنے کا موقع فراہم کر رہا ہے۔ تاہم، انہوں نے خبردار کیا ہے کہ ذاتی تصاویر اور معلومات غیر محفوظ ویب سائٹس پر اپ لوڈ کرنے سے گریز کیا جائے۔

واضح رہے کہ گوگل اے آئی ماڈلز کو تربیت دینے کے لیے صارفین کے مواد کا استعمال کر سکتا ہے، لہٰذا پرائیویسی سیٹنگز چیک کرنا ضروری ہے۔