بیورو آف امیگریشن اینڈ اوورسیز ایمپلائمنٹ پاکستان کی جانب سے ایک اہم اعلامیہ جاری کیا گیا ہے جس میں کہا گیا ہے کہ پروٹیکٹر آف ایمیگرنٹس دفاتر میں فیسوں کی وصولی اور جمع کرانے کا عمل ناگزیر وجوہات کی بنا پر عارضی طور پر معطل کر دیا گیا ہے۔
متعلقہ دفاتر میں روزمرہ کے امور متاثر
اس فیصلے کے بعد ملک بھر میں قائم متعلقہ دفاتر میں روزمرہ کے معمول کے امور متاثر ہوئے ہیں، خصوصاً وہ خدمات جو بیرون ملک روزگار کے لیے جانے والے شہریوں سے متعلق ہیں۔
تعطل کیوں آیا؟
نجی ٹی وی کی رپورٹ کے مطابق کہا گیا ہے کہ یہ تعطل ایک تکنیکی خرابی کے باعث پیش آیا ہے جس کی وجہ سے فیسوں کی وصولی کا نظام درست طور پر کام نہیں کر رہا، اس صورتحال کے نتیجے میں مختلف پروسیسنگ مراحل میں تاخیر کا سامنا بھی ہو سکتا ہے، جس سے بیرون ملک ملازمت کے خواہشمند افراد کو مشکلات پیش آ سکتی ہیں۔
بیورو نے واضح کیا ہے کہ یہ مسئلہ عارضی نوعیت کا ہے اور متعلقہ تکنیکی ٹیمیں اس خرابی کو دور کرنے کے لیے مسلسل کام کر رہی ہیں، ادارے کا کہنا ہے کہ جیسے ہی نظام بحال ہوگا، تمام شہریوں کو فوری طور پر آگاہ کر دیا جائے گا تاکہ وہ دوبارہ اپنی فیسیں جمع کروا سکیں اور متعلقہ کارروائی مکمل کر سکیں۔
یورو آف امیگریشن اینڈ اوورسیز ایمپلائمنٹ نے شہریوں خصوصاً بیرون ملک روزگار کے لیے جانے والے افراد کو مشورہ دیا ہے کہ وہ فی الحال غیر ضروری طور پر دفاتر کا رخ نہ کریں، اس ہدایت کا مقصد دفاتر میں رش کو کم کرنا اور شہریوں کے وقت اور وسائل کے ضیاع کو روکنا ہے۔
شہریوں سے اپیل
اعلامیے میں یہ بھی یقین دہانی کرائی گئی ہے کہ صورتحال کو جلد معمول پر لایا جائے گا اور فیسوں کی وصولی کا نظام مکمل طور پر بحال ہوتے ہی تمام خدمات دوبارہ معمول کے مطابق شروع کر دی جائیں گی، ادارے نے شہریوں سے تعاون کی اپیل کرتے ہوئے کہا ہے کہ وہ سرکاری ہدایات کا انتظار کریں اور افواہوں پر کان نہ دھریں۔
By 
