پاک بھارت میچ میں متنازع گفتگو ، بھارتی کپتان سوریا کمار کیخلاف کارروائی کا امکان

بھارتی کرکٹ ٹیم کے کپتان سوریا کمار یادیو کوہیرو بننا مہنگا پڑسکتا ہے ،پاکستان نے سوریا کمار یادیو کے بیان کے خلاف شکایت کی تھی جس پر ان کے خلاف کارروائی کا امکان ہے۔

بھارتی میڈیا کے مطابق پاکستان کرکٹ بورڈ کی شکایت پر آئی سی سی نے معاملے کا نوٹس لیتے ہوئے بھارتی کپتان کے خلاف کارروائی کا عندیہ دیا ہے۔

ایشیا کپ کے میچ ریفری رچی رچرڈسن معاملے کو دیکھ رہے ہیں۔

پاکستان کے خلاف گروپ اسٹیج کے میچ کے بعد سوریا کمار یادیو نے سیاسی جملے بولے تھے، پاکستان نے سوریا کمار یادیو کے خلاف آئی سی سی کو باقاعدہ شکایت کی تھی۔

بھارتی میڈیا کے مطابق آئی سی سی پاکستان کے شکایت کا جائزہ لے رہا ہے، جلد اس کی باضابطہ سماعت ہوگی، پاکستان کی طرف سے 2 آفیشل رپورٹس ملی ہیں۔

یہ بھی پڑھیں : رافیل کیسے گرائے تھے؟ حارث رؤف نے بھارتی شائقین کو بتادیا

میچ ریفری رچی رچرڈسن نے پاکستان کی شکایت ملنے پر بھارتی ٹیم مینجمنٹ کو ای میل کرتے ہوئے کہا ہے کہ لگتا ہے سوریا کمار نے کھیل کی ساکھ کو نقصان پہنچایا۔

میچ ریفری کی جانب سے کہا گیا ہے کہ پاکستان کے جمع کرائے گئے شواہد کے جائزے کے بعد سوریا کمار کے خلاف کارروائی ہونی چاہیے، سوریا کمار یادیو نے کھیل کے مفاد کے خلاف غیر مناسب ریمارکس دیے۔

بھارتی میڈیا کے مطابق سوریا کمار یادیو کے خلاف کارروائی کا جلد امکان ہے۔

یہ بھی پڑھیں : ایشیا کپ کا فائنل کون کھیلے گا؟پاکستان اور بنگلہ دیش میں فیصلہ کن ٹاکرا آج

واضح رہےکہ بھارتی کپتان سوریا کمار نے ایشیا کپ کے گروپ اسٹیج میچ میں جیت کے بعد پریزنٹیشن میں گفتگو کرتے ہوئے پہلگام واقعے کا ذکر کرتے ہوئے متنازع بات کی تھی۔