راولاکوٹ، پولیس کی فلیگ مارچ پارٹی پرکالعدم عوامی ایکشن کمیٹی کے شرپسندوں کی اندھا دھند فائرنگ، کلاشنکوف کی 7.62 ایم ایم گولیوں سے بکتر بند گاڑی کو نقصان

آزاد جموں کشمیر کے ضلع راولاکوٹ میں امن و امان کی صورتحال اس وقت انتہائی کشیدہ ہو گئی جب کالعدم عوامی ایکشن کمیٹی کے شرپسند عناصر نے معمول کے گشت پر مامور پولیس کی فلیگ مارچ پارٹی پر اندھا دھند فائرنگ کر دی۔

اس حملے میں پولیس کی بکتر بند گاڑی کو نشانہ بنایا گیا، تاہم خوش قسمتی سے بکتر بند گاڑی کی مضبوطی کے باعث کوئی جانی نقصان نہیں ہوا، البتہ گاڑی کو شدید نقصان پہنچا ہے۔

سیکیورٹی ذرائع اور مقامی انتظامیہ کے مطابق راولاکوٹ میں امن و امان کو برقرار رکھنے اور شہریوں کو تحفظ فراہم کرنے کے لیے پولیس کی ایک فلیگ مارچ پارٹی معمول کے مطابق گشت کر رہی تھی۔

یہ بھی پڑھیں:راولاکوٹ کے اطراف میں کالعدم عوامی ایکشن کمیٹی کا پڑاؤ، گھروں میں کھانے پینے کے سامان کی قلت، چور اُچکوں نے دکانیں لوٹنا شروع کردیں

جیسے ہی یہ سیکیورٹی قافلہ عیدگاہ کے قریبی علاقے میں پہنچا، وہاں پہلے سے گھات لگائے بیٹھے کالعدم عوامی ایکشن کمیٹی کے شرپسندوں نے اچانک پولیس پارٹی پر خودکار ہتھیاروں اور کلاشنکوفوں سے فائر کھول دیا۔

حملہ آوروں نے انتہائی بزدلی کا مظاہرہ کرتے ہوئے پولیس کی بکتر بند ‘ایل ڈی جی، اے پی سی’ گاڑی پر کلاشنکوف کی 7.62 ایم ایم کی 30 سے زیادہ گولیاں برسا دیں۔

فائرنگ کی شدت اتنی زیادہ تھی کہ متعدد گولیاں بکتر بند گاڑی کے پچھلے دونوں ٹائروں میں جا پیوست ہوئیں، جس سے گاڑی کے ٹائر کو شدید نقصان پہنچا ہے۔

راولاکوٹ اور گرد و نواح کے اضلاع میں کالعدم عوامی ایکشن کمیٹی کی جانب سے حالیہ دنوں میں ہڑتال اور احتجاج کی کالز دی گئی تھیں۔

میرپور جیسے صنعتی شہروں میں جہاں عوام نے اس کال کو مسترد کر دیا اور زندگی معمول کے مطابق بحال رہی، وہیں راولاکوٹ جیسے چند مخصوص پہاڑی اور دور دراز اضلاع میں شرپسند عناصر کی جانب سے اب بھی امن و امان کو سبوتاژ کرنے کی کوششیں کی جا رہی ہیں۔

مزید پڑھیں:بلی تھیلے سے باہر آ گئی: آٹا، بجلی اور 12 سیٹیں صرف بہانہ، کالعدم عوامی ایکشن کمیٹی کا مکروہ چہرہ بالآخر بے نقاب

پولیس پر حملے کے لیے کلاشنکوف کے 7.62 ایم ایم بور کے ہتھیاروں کا استعمال یہ ظاہر کرتا ہے کہ یہ محض ایک عام عوامی احتجاج نہیں ہے، بلکہ پُرامن تحریک کی آڑ میں کچھ عناصر باقاعدہ عسکری یا نیم عسکری طرز پر قانون نافذ کرنے والے اداروں کو نشانہ بنا رہے ہیں۔

 ‘ایل ڈی جی، اے پی سی’ (آرمرڈ پرسنل کیریئر) ایک ایسی بکتر بند گاڑی ہے جو گولیوں کا اثر اندر بیٹھے اہلکاروں تک پہنچنے نہیں دیتی، اسی وجہ سے اس بڑے حملے میں پولیس اہلکار محفوظ رہے۔