فلپائن 6.9 شدت کے زلزلے سے لرز اٹھا، 60 افراد ہلاک

فلپائن کے وسطی علاقوں میں 6.9 شدت کے زلزلے نے تباہی مچادی ہے، زلزلے کے باعث حادثات میں اب تک 60 افراد ہلاک جبکہ کئی عمارتیں زمین بوس ہوگئیں۔

فلپائن کے انسٹی ٹیوٹ آف وولکینالوجی اینڈ سیسمولوجی کے مطابق زلزلہ رات 10 بجے کے قریب سیبو میں آیا، جو کہ 32 لاکھ سے زائد آبادی کا حامل صوبہ ہے۔ زلزلے کے بعد کئی آفٹر شاکس بھی محسوس کیے گئے ، زلزلے کی گہرائی 10 کلو میٹر ریکارڈ کی گئی۔

میڈیا رپورٹس کے مطابق زلزلے کے باعث کئی عمارتیں زمین بوس ہوگئیں جبکہ 30 سے زائد زخمیوں کو اسپتال منتقل کردیا گیا ہے۔

خبر رساں اداروں کے مطابق وسطی ساحلی علاقے میں زلزلے کے بعد آفٹر شاکس بھی محسوس کئے گئے ہیں جس کے باعث لوگ اپنے گھروں سے باہر نکل آئے۔

یہ بھی پڑھیں : روس کے علاقے کامچاٹکا کے قریب 8.7 شدت کا زلزلہ، بحرالکاہل میں سونامی کی وارننگز جاری

فلپائنی حکام کا کہنا ہے کہ ملبے تلے دبے افراد کو ریسکیو کرنے کےلیے آپریشن جاری ہے، متاثرہ علاقوں میں بھاری مشینریز روانہ کردی گئی ہے۔

فلپائن کے مرکزی صوبے سیبو میں زیادہ نقصان ہوا ہے ، سیبو کے اسکولز اور سرکاری دفاتر بدھ کے روز بند کر دیے گئے ہیں تاکہ عمارتوں کا معائنہ کیا جا سکے۔

زلزلے سے کئی گرجا گھروں کو شدید نقصان پہنچا ہے ، آرچ ڈایوسیز آف سیبو نے تمام چرچز میں عبادات روکنے کی ہدایت دی ہے جب تک معائنہ مکمل نہ ہو۔

یہ بھی پڑھیں : فیس بک اور انسٹاگرام مفت نہیں رہے ! صارفین اب فیس ادا کرینگے

فاسٹ فوڈ ریسٹورنٹس، اپارٹمنٹس اور تاریخی عمارتوں کی تصاویر میں بھی شدید نقصان دیکھا جا سکتا ہے۔

ایک امریکی اخبار نے فلپائنی حکام کا حوالہ دیتے ہوئے بتایا کہ زلزلے کے نتیجے میں 4 عمارتیں زمین بوس ہوگئیں، اس کے علاوہ 3 سرکاری عمارتوں کو بھی نقصان پہنچا جبکہ متاثرہ علاقے میں 6 پلوں اور ایک سڑک کو بھی شدید نقصان پہنچا۔