ایئرپورٹ رن وے پر دو طیارے آپس میں ٹکرا گئے

نیو یارک کے لاگوارڈیا ایئرپورٹ پر بدھ کی رات ڈیلٹا ایئر لائنز کے دو ریجنل طیارے رَن وے پر آہستہ چلتے ہوئے آپس میں ٹکرا گئے۔ حادثے میں ایک ایئر ہوسٹس زخمی ہوئیں جنہیں فوری طور پر ہسپتال منتقل کیا گیا، تاہم خوش قسمتی سے تمام مسافر محفوظ رہے۔

ابتدائی معلومات کے مطابق اندیور ایئر کی وہ پرواز جو رونوک، ورجینیا کے لیے روانہ ہونے والی تھی، اس کا ونگ اس پرواز سے ٹکرا گیا جو شارلٹ، نارتھ کیرولائنا سے آ کر اتری تھی۔ یہ تصادم رات تقریباً 10 بجے ٹیکسی وے پر پیش آیا۔ ٹکر کے بعد ایک طیارے کا فرنٹ بری طرح متاثر ہوا جبکہ دوسرے کا بازو ٹوٹ گیا۔

سوشل میڈیا پر وائرل ہونے والی تصاویر اور ویڈیوز میں ایمرجنسی گاڑیاں موقع پر پہنچتی دکھائی دیں، جبکہ مسافروں اور عملے کو فوری طور پر بسوں کے ذریعے واپس ٹرمینل منتقل کر دیا گیا۔ ڈیلٹا ایئرلائنز کے مطابق ایک طیارے میں 28 اور دوسرے میں 57 مسافر سوار تھے۔ سب کو خوراک اور مشروبات فراہم کیے گئے اور رات گزارنے کے لیے ہوٹل جبکہ دوبارہ پرواز کے لیے ری بُکنگ کی سہولت بھی فراہم کی جا رہی ہے۔

یہ بھی پڑھیں: پاکستان کی گلوبل صمود فلوٹیلا پر اسرائیلی حملے کی شدید مذمت، فلسطینی ریاست کے قیام کی مکمل حمایت کا اعادہ

ایک مسافر نے امریکی اخبار کو بتایا کہ “ہم شارلٹ سے لینڈ کرنے کے بعد گیٹ کی طرف جا رہے تھے کہ اسی دوران ایک اور ڈیلٹا ریجنل جیٹ آ کر ہمارے طیارے سے ٹکرا گیا۔”

ڈیلٹا ایئرلائن نے اپنے بیان میں کہا کہ “ہم اپنے تمام صارفین اور عملے کی حفاظت کو سب سے مقدم رکھتے ہیں۔ اس افسوسناک واقعے پر ہم معذرت خواہ ہیں اور تمام مسافروں کی دیکھ بھال کے لیے ہر ممکن اقدامات کیے جا رہے ہیں۔”