حکومت کا ہونہار پلس اسکالرشپ پروگرام کا اعلان، دنیا کی ٹاپ یونیورسٹیوں میں پڑھنے کا موقع

پنجاب حکومت نے آئندہ تعلیمی سال کے لیے ذہین اور ہونہار طلبا کے لیے ایک بڑا اقدام اٹھاتے ہوئے ہونہار پلس اسکالرشپ پروگرام شروع کر دیا ہے۔

اس پروگرام کے تحت صوبے کے قابل طلبا کو دنیا کی اعلیٰ 200 یونیورسٹیوں اور آئی وی لیگ اداروں میں تعلیم حاصل کرنے کا موقع دیا جائے گا۔

اس اسکالرشپ کے ذریعے منتخب طلبا کو 100 فیصد مالی معاونت فراہم کی جائے گی جس میں ٹیوشن فیس، ماہانہ وظیفہ، ہیلتھ انشورنس اور سالانہ ایئر ٹکٹ شامل ہیں۔ حکام کے مطابق ہر طالب علم پر اوسطاً ایک کروڑ 65 لاکھ روپے خرچ ہوں گے، جبکہ مجموعی طور پر 800 طلبا کو 4 سال تک یہ سہولت دی جائے گی۔

پروگرام میں ایم ایس، ماسٹرز، ایم فل، ٹریننگ اور ایکسچینج پروگرامز شامل ہیں۔ حکومت پنجاب اس منصوبے پر تقریباً 13 ارب روپے خرچ کرے گی تاکہ صوبے کے ذہین طلبا عالمی معیار کی تعلیم حاصل کر سکیں اور پاکستان کے روشن مستقبل میں کردار ادا کریں۔

یہ بھی پڑھیں: امریکی صدر سے وزیراعظم اور فیلڈ مارشل کی ملاقات، سیکورٹی و انٹیلی جنس تعاون بڑھانے پر زور،اعلامیہ

اسکالرشپ کے لیے صرف وہ طلبا اہل ہوں گے جنہوں نے کم از کم 16 سالہ تعلیم مکمل کی ہو، ان کا CGPA کم از کم 3.50 ہو اور وہ پنجاب کے ڈومیسائل کے حامل ہوں۔ پروگرام میں عمر کی کوئی حد مقرر نہیں کی گئی اور تمام نشستیں میرٹ کی بنیاد پر دی جائیں گی۔

ماہرینِ تعلیم کا کہنا ہے کہ یہ اقدام نہ صرف پاکستان کے تعلیمی معیار کو بلند کرے گا بلکہ عالمی سطح پر ملک کی ساکھ کو بہتر بنانے میں بھی مددگار ثابت ہوگا۔