پنجاب : پبلک ٹرانسپورٹ میں اوورچارجنگ کی شکایات کے لیے ہیلپ لائن کا آغاز

وزیراعلیٰ مریم نواز کے ویژن فار ٹرانسپورٹ 2030 کے تحت پنجاب ٹرانسپورٹ ڈیپارٹمنٹ نے ایک مخصوص ہیلپ لائن 1071 کا آغاز کیا ہے تاکہ شہریوں کی سفر سے متعلق شکایات کو سنا جا سکے۔

تفصیلات کے مطابق اس نئے نظام کے ذریعے مسافر فوری طور پر اوورچارجنگ، ڈرائیور کے بدتمیز رویے اور دیگر سروس سے متعلق مسائل کی شکایت درج کروا سکتے ہیں۔ اس اقدام کا مقصد پنجاب کے پبلک ٹرانسپورٹ سسٹم کو زیادہ مؤثر، ذمہ دار اور مسافروں کے لیے دوستانہ بنانا ہے۔

حکام کے مطابق یہ ہیلپ لائن حکومت کے بڑے منصوبے ٹرانسپورٹ 2030 ویژن کا حصہ ہے جس کا مقصد محفوظ، جدید، اور سمارٹ سفری سہولیات فراہم کرنا ہے۔

حکام نے کہا کہ یہ نیا نظام ٹرانسپورٹ آپریٹرز میں زیادہ احتساب کو یقینی بنائے گا اور شہریوں کو اپنی شکایات براہ راست درج کرانے کا ایک مؤثر ذریعہ فراہم کرے گا۔