وفاقی وزارتِ داخلہ نے دارالحکومت اسلام آباد اور راولپنڈی میں موبائل انٹرنیٹ سروسز غیر معینہ مدت کے لیے بند کرنے کا باقاعدہ نوٹیفیکیشن جاری کردیا ہے۔
وزارتِ داخلہ کے مطابق یہ فیصلہ سیکیورٹی خدشات اور علاقے میں امن و امان کی صورتحال کے پیش نظر کیا گیا ہے۔ نوٹیفیکیشن میں کہا گیا ہے کہ موبائل ڈیٹا اور انٹرنیٹ سروسز آج رات سے اگلے احکامات تک بند رہیں گی۔ البتہ لینڈ لائن فون سروسز اور وائی فائی نیٹ ورکس معمول کے مطابق جاری رہیں گے۔
ذرائع کے مطابق وزارتِ داخلہ نے پاکستان ٹیلی کمیونی کیشن اتھارٹی (PTA) اور متعلقہ موبائل کمپنیوں کو فوری طور پر عمل درآمد کی ہدایت جاری کردی ہے۔ سیکیورٹی حکام کا کہنا ہے کہ مخصوص علاقوں میں حساس تقریبات، ممکنہ احتجاجی مظاہروں اور ہجوم کے خدشات کے باعث یہ اقدام اٹھایا گیا ہے تاکہ امن و امان کی صورتحال کو قابو میں رکھا جا سکے۔
عوامی حلقوں کی جانب سے انٹرنیٹ کی بندش پر تشویش کا اظہار کیا جا رہا ہے، خاص طور پر طلبہ، آن لائن کاروبار کرنے والے افراد اور ڈیجیٹل پلیٹ فارمز سے وابستہ شہریوں نے اسے ایک بڑا نقصان قرار دیا ہے۔
ذرائع کے مطابق سروسز کی بحالی کا فیصلہ سیکیورٹی اداروں کی سفارشات اور حالات کے جائزے کے بعد کیا جائے گا۔
By 
