عازمین کے لیے حج بکنگ سے متعلق بڑی خوشخبری

پرائیویٹ اسکیم کے تحت حج 2026 پر روانگی کے خواہش مند عازمین حج کے لیے خوشخبری سامنے آئی ہے، وزارت مذہبی امور نے پرائیویٹ حج کی بکنگ کی ڈیڈ لائن میں 5 دن کی توسیع کر دی۔

تفصیلات کے مطابق وزارت سے منظور شدہ حج منظم کمپنیوں کو حج پالیسی 2026 اور سروسز پرووائیڈر ایگریمنٹ (SPA) کے مطابق 22 اکتوبر تک پرائیویٹ حج کی بکنگ مکمل کرنے کی ہدایت جاری کر دی۔

وزارت مذہبی امور کے مطابق نجی حج اسکیم کے لیے امسال 60 ہزار نشستیں رکھی گئی ہیں، 55 ہزار 500 عازمین حج نے بکنگ مکمل کر لی ہے جب کہ ابھی بھی ساڑھے 4 ہزار نشستیں پرائیویٹ سکیم میں دستیاب ہیں۔

یہ بھی پڑھیں : کسی مجبوری کے باعث حج پر نہ جا سکنے والے عازمین کیلئے بڑی خبر

ترجمان مذہبی امور نے کہا ہے کہ وزارت کی ویب سائٹ سے منظور شدہ حج کمپنیوں کی لازمی تصدیق کریں جب کہ حج واجبات کی ادائیگی ہمیشہ بینکنگ چینل کے ذریعے کمپنی اکاونٹ میں کریں۔

حج معاہدے کی کاپی اور کمپیوٹرائزڈ رسید ضرور طلب کریں، وزارت کی ویب سائٹ اور پاک حج 2026 موبائل ایپ پر بکنگ کی تفصیلات اور اپنے کوائف لازمی چیک کر لیں۔

پرائیویٹ حج اسکیم کی بکنگ کا آغاز گزشتہ ماہ 19 ستمبر کو ہوا تھا۔

واضح رہے کہ گزشتہ برس پرائیویٹ حج اسکیم کے تحت ہزاروں عازمین مکمل رقم جمع کرائے جانے کے باوجود حج کی سعادت حاصل کرنے سے محروم رہے گئے تھے،  جس کے بعد حکومت نے رواں برس پرائیویٹ آپریٹرز کا کوٹہ 90 ہزار سے کم کر کے 60 ہزار کر دیا گیا تھا۔

 وزارت مذہبی امور کےمطابق پرائیویٹ حج آپریٹرزکا کوٹہ 60 ہزارمقررکیا گیا ہے۔ 22 ہزار 97 عازمین گزشتہ برس کے 37 ہزار903 نئے درخواست گزارحج پر جاسکیں گے۔

یہ بھی پڑھیں :سعودی وزارت حج و عمرہ نے حجاج کرام کے لئے تین اہم ہدایات جاری کر دیں

قبل ازیں مذہبی امورکے مطابق سرکاری حج درخواستوں کی وصولی کا عمل ماضی کے مقابلے میں قبل از وقت مکمل کرلیا گیاہے، پہلے مرحلے میں رجسٹرڈ عازمین سے حج درخواستیں وصول کی گئی تھیں جس کے بعد غیر رجسٹرڈ افراد کیلئے حج درخواستیں جمع کرانے کا مرحلہ شروع کیا گیا تھا۔