حکومت کا خصوصی افراد کے لیے بڑا اعلان

پنجاب حکومت نے خصوصی افراد کی فلاح و بہبود کے لیے ایک اہم اقدام اٹھاتے ہوئے ان کے لیے باقاعدہ وظیفے کا اعلان کر دیا ہے۔ اس اقدام کا مقصد معذور اور خصوصی ضرورت رکھنے والے افراد کو معاشی سہارا فراہم کرنا اور ان کی زندگی کو زیادہ آسان اور بہتر بنانا ہے۔

تفصیلات کے مطابق، حکومت پنجاب نے ہمت کارڈ رکھنے والے خصوصی افراد کو ہر تین ماہ بعد ساڑھے دس ہزار روپے دینے کا فیصلہ کیا ہے۔ نابینا افراد کے لیے رقم میں اضافہ کرتے ہوئے انہیں 12 ہزار روپے فراہم کیے جائیں گے۔ اس کے ساتھ ہی نابینا افراد کو وہیل چیئرز بھی دی جائیں گی تاکہ وہ اپنی روزمرہ زندگی کے کام بہتر طریقے سے سرانجام دے سکیں اور زیادہ سہولت حاصل کر سکیں۔

حکومت پنجاب نے خصوصی افراد کو ہدایت کی ہے کہ وہ اپنا “سپیشل پرسن شناختی کارڈ” بنوائیں تاکہ انہیں حکومتی وظائف اور دیگر سہولیات سے فائدہ حاصل کرنے میں آسانی ہو۔ حکومت کی جانب سے یہ بھی واضح کیا گیا ہے کہ امداد کے خواہش مند افراد کے لیے رجسٹریشن کا طریقہ کار نہایت آسان رکھا گیا ہے۔ خصوصی افراد صرف اپنا شناختی کارڈ نمبر 8123 پر ایس ایم ایس کر کے اپنی رجسٹریشن مکمل کر سکتے ہیں۔

یہ بھی پڑھیں: پاکستانی طلبہ کے لئے خوشخبری، روس کی جانب سے ’’فل فنڈڈ اسکالرشپ پروگرام ‘‘ کا اعلان

حکومتی ترجمان کے مطابق، یہ پروگرام خصوصی افراد کے لیے ایک جامع فلاحی منصوبہ ہے جس کے تحت انہیں نہ صرف مالی مدد فراہم کی جائے گی بلکہ وہ بنیادی سہولیات سے بھی مستفید ہوں گے۔ ترجمان نے کہا کہ اس منصوبے کا مقصد خصوصی افراد کو باعزت زندگی گزارنے کے مواقع فراہم کرنا اور انہیں معاشرے کا فعال اور مؤثر حصہ بنانا ہے۔

یہ اقدام پنجاب حکومت کی جانب سے خصوصی افراد کی معاشی اور سماجی بہتری کے لیے ایک نمایاں قدم سمجھا جا رہا ہے، جو انہیں خود مختار بنانے میں مددگار ثابت ہوگا۔