ترکیہ کا فائر فائٹنگ طیارہ کروشیا میں گر کر تباہ، پائلٹ جاں بحق

ترکیہ کے محکمہ جنگلات کا فائر فائٹنگ طیارہ کورشیا میں گرکر تباہ ہوگیا، حادثے میں طیارے کا پائلٹ جاں بحق ہوگیا۔

غیر ملکی خبر ایجنسی کے مطابق ترک وزیر زراعت و جنگلات ابراہیم یومکلی نے بتایا ہے کہ یورپی ملک کروشیا میں لاپتہ ہونے والے ترک فائر فائٹنگ طیارے کا ملبہ مل گیا ہے ، ترک ڈائریکٹوریٹ آف فارسٹری کے آگ بجھانے والے 2 طیارے ایک طے شدہ پروگرام کے مطابق مرمت اور دیکھ بھال کیلئے کروشیا کے زگریب ہوائی اڈے پر موجود تھے۔

یہ بھی پڑھیں:کینیا میں طیارہ گر کر تباہ، غیر ملکی سیاحوں سمیت متعدد افراد کی ہلاکت کا خدشہ

انہوں نے بتایا کہ زگریب ہوائی اڈے پر دونوں طیاروں اور ان کے عملے نے ایک رات قیام بھی کیا جہاں سے اگلے دن ان دونوں طیاروں نے ترکی کیلئے روانہ ہونا تھا، اگلے دن شیڈول کے مطابق دونوں طیارے زگریب ہوائی اڈے سے روانہ ہوئے، تاہم موسم کی خرابی کی باعث دونوں طیاروں کو کروشیا کے ریجیکا ایئرپورٹ پر واپس بلایا گیا۔

دو میں سے ایک طیارہ واپس نہیں آسکا اور مقامی وقت کے مطابق اس کا رابطہ شام 6 بجکر 25 منٹ پر منقطع ہوگیا تھا۔

 حادثے پر ترک صدر رجب طیب اردوان نے گہرے دکھ کا اظہار کیا ہے۔

یہ بھی پڑھیں : امریکی ریاست کینٹکی میں کارگو طیارہ گر کر تباہ، 3 افراد ہلاک، 11 زخمی

واضح رہے کہ  رواں ہفتے ایک اور ترک طیارہ  جیارجیا اور آذربائیجان کی سرحد پر حادثے کا شکار ہوا تھا جس کے نتیجے میں جہاز پر سوار 20 افراد جاں بحق ہوگئے تھے۔

یہ حادثہ ترکیہ میں حالیہ سالوں میں ہونے والے فوجی طیاروں کے حادثات کا سلسلہ ہے۔ جون 2024 میں بھی تربیتی طیارہ گر کر تباہ ہوا جس میں 2 فوجی ہلاک ہوئے اور دسمبر 2024 میں ایک فوجی ہیلی کاپٹر کے حادثے میں 6 فوجی ہلاک ہوئے تھے۔