بالی وڈ کے لیجنڈری اداکار دھرمیندر 89 برس کی عمر میں چل بسے

بھارتی فلم انڈسٹری کے معروف اداکار اور بالی وڈ کے لیجنڈ اداکار دھرمیندر 89 برس کی عمر میں انتقال کر گئے۔

بھارتی میڈیا رپورٹ کے مطابق معروف اداکار گزشتہ کچھ عرصے سے علیل تھے، گزشتہ دنوں ان کو سانس سے متعلق شدید تکالیف کےباعث اسپتال میں داخل کیا گیا تھا۔

دلوں کو چھو لینے والے ڈراموں سے لے کر لیجنڈری بلاک بسٹرز تک، دھرمیندر کا فلمی سفر چھ دہائیوں پر محیط ہے ، جس نے بھارتی سنیما کو ایک نئی پہچان دی ، دھرمیندر نے 1958 میں فلم دل بھی تیرا ہم بھی تیرے سے فلمی کیریئر کا آغاز کیا، اپنی شاندار اداکاری اور منفرد انداز کے باعث وہ جلد ہی ناظرین کے دلوں پر چھا گئے۔

دھرمندر کو ہی مین آف انڈین سنیما کے لقب سے بھی یاد کیا جاتا ہے، انہوں نے شعلے، چپکے چپکے، دھرم ویر، سیتا اور گیتا اور یادوں کی بارات جیسی کلاسک فلموں سے بھارتی سنیما میں ناقابلِ فراموش مقام حاصل کیا۔

دھرمندر نے کیریئر میں اپنی پرفارمنس، قدرتی دلکشی اور بے مثال ورسٹائل اداکاری کے ذریعے ناظرین کے دلوں میں اپنی خاص پہچان بنائی۔

انہوں نے ایکشن سے لے کر دل کو چھو لینے والی کامیڈی اور جذباتی ڈراموں تک میں شاندار کردار ادا کیے اور بھارتی سنیما کی تاریخ کے چند یادگار کردار تخلیق کیے۔

رپورٹس کے مطابق دھرمیندر نے آخری بار اپنی اداکاری کے جوہر فلم اکیس  میں دکھائے جو 25 دسمبر کو ریلیز ہونے والی ہے۔

 

View this post on Instagram

 

A post shared by Karan Johar (@karanjohar)

انہیں 2012 میں حکومت ہند کی جانب سے ہندوستان کے تیسرے سب سے بڑے شہری اعزاز پدم بھوشن سے نوازا گیا تھا۔

خیال رہے کہ گزشتہ ماہ بھی دھرمیندر کے انتقال کی جھوٹی خبریں سامنے آئی تھیں، جس پر ان کی بیٹی ایشا دیول اور اہلیہ ہیما مالینی نے تردید کی تھی۔