ریاست مخالف مہم چلانے کے الزام میں پی ٹی آئی قیادت کی جے آئی ٹی کے سامنے پیشی، اندرونی کہانی سامنے آگئی

تحریک انصاف کی سوشل میڈیا ٹیم کی جے آئی ٹی میں پیش ہونے کی اندرونی کہانی سامنے آگئی۔

ذرائع کے مطابق تحریک انصاف کے طلب کردہ افراد سے سوشل میڈیا ہینڈلنگ سے متعلق سوالات کیے گئے۔ پاک فوج اور ریاستی اداروں سے متعلق سوشل میڈیا پوسٹس پر سخت سوالات پوچھے گئے۔

مزید پڑھیں: پی ٹی آئی کا نئے چیف الیکشن کمشنر کی تعیناتی جلد کرنے کا مطالبہ

پاکستان تحریک انصاف کے رہنمائوں کو سوشل میڈیا پر پوسٹس سے متعلق سب کچھ دکھایا گیا۔ جے آئی ٹی نے چئیرمین پی ٹی آئی بیرسٹر گوہرعلی و دیگر سے پارٹی فنانسنگ سے متعلق بھی سوالات پوچھے جبکہ طلبی کے باوجود پیش نہ ہونے والے افراد کے خلاف سخت ایکشن لینے کا فیصلہ کیا۔

ذرائع کا کہنا ہے کہ جے آئی ٹی نے واضح کیا کہ پیش نہ ہونے والوں افراد کے خلاف سخت ایکشن لیا جائے گا۔ تحریک انصاف کے فنانس ڈیپارٹمنٹ کے دو افراد بھی جے آئی ٹی کے سامنے پیش ہوئے۔ عالیہ حمزہ اور کنول شوذب کی جانب سے ان کے وکیل ڈاکٹر علی عمران جے آئی ٹی میں پیش ہوئے۔ عالیہ حمزہ اور کنول شوذب کی آج کی مشروط حاضری قبول کر لی گئی۔

جے آئی ٹی نے آئندہ طلبی پر دونوں خواتین رہنما ئوں کو ہر صورت پیش ہونے کی ہدایت کی۔

واضح رہے کہ پاکستان تحریک انصاف کے پندرہ پارٹی ارکان کو جے آئی ٹی نے طلب کیا تھا۔ تحریک انصاف کے صرف تین رہنما آج جے آئی ٹی میں پیش ہوئے۔ جے آئی ٹی نے شیخ وقاص اکرم، سلمان اکرم راجہ، خالد خورشید خان کو نوٹس جاری کر رکھا ہے۔ اس کے علاوہ جے آئی ٹی نے عون عباس بپی، کنول شوزب اور عالیہ حمزہ کوبھی طلب کر رکھا ہے۔