آئی سی سی نے کرکٹ ’پلیئر آف دی منتھ‘ کے فاتح کا اعلان کر دیا

انٹرنیشنل کرکٹ کونسل (آئی سی سی) نے مارچ 2026 کے لیے ’پلیئر آف دی منتھ‘ کے فاتح کا اعلان کر دیا ہے، جس کے مطابق بھارتی ٹیم کے اسٹار بلے باز سنجو سیمسن یہ ایوارڈ جیتنے میں کامیاب رہے ہیں۔ یہ ان کے کیریئر کا پہلا موقع ہے کہ انہوں نے آئی سی سی کا یہ باوقار عالمی اعزاز اپنے نام کیا ہے۔

یہ بھی پڑھیں:صاحبزادہ فرحان نے آئی سی سی پلیئر آف دی منتھ کا اعزاز اپنے نام کر لیا

سنجو سیمسن کی اس کامیابی میں حالیہ ٹی 20  ورلڈ کپ 2026 میں ان کی شاندار کارکردگی نے کلیدی کردار ادا کیا۔ انہوں نے مارچ کے مہینے میں کھیلے گئے صرف 3 میچوں میں 275 رنز اسکور کیے، جس میں ان کی مستقل مزاجی اور بڑے شاٹس کھیلنے کی صلاحیت نمایاں رہی۔ بھارتی ٹیم کو ورلڈ کپ جتوانے میں ان کی اننگز نے ریڑھ کی ہڈی کا کردار ادا کیا تھا، جس کا اعتراف اب عالمی سطح پر بھی کر لیا گیا ہے۔

ایوارڈ ملنے پر خوشی کا اظہار کرتے ہوئے سنجو سیمسن نے کہا کہ ’آئی سی سی پلیئر آف دی منتھ کا ایوارڈ جیتنا میرے لیے اعزاز کی بات ہے اور یہ میرے کرکٹ کیریئر کا سب سے یادگار لمحہ ہے‘۔

انہوں نے اپنی اس کامیابی کو ٹیم ورک اور مداحوں کی محبت کے نام منسوب کیا۔ آئی سی سی ‘پلیئر آف دی منتھ’ ایوارڈ کا مقصد ہر ماہ بین الاقوامی کرکٹ کے تمام فارمیٹس میں بہترین کارکردگی دکھانے والے مرد اور خواتین کھلاڑیوں کی حوصلہ افزائی کرنا ہے۔

مزید پڑھیں:آئی سی سی رینکنگ : زمبابوے کے سکندر رضا ٹی ٹوئنٹی کے نمبر ون آل راؤنڈر بن گئے

سنجو سیمسن، جو طویل عرصے سے اپنی باری کا انتظار کر رہے تھے، 2026 کے ٹی20 ورلڈ کپ میں ایک بالکل مختلف اور جارحانہ رنگ میں نظر آئے۔ ان کی تکنیک اور پریشر کے حالات میں رنز بنانے کی صلاحیت نے انہیں اس ماہ کے دیگر نامزد امیدواروں پر برتری دلائی۔ یہ اعزاز نہ صرف ان کی انفرادی محنت کا ثمر ہے بلکہ بھارتی کرکٹ کے بڑھتے ہوئے اعتماد کی بھی عکاسی کرتا ہے۔