پی ایس ایل شائقین کیلئے چیئرمین پی سی بی کی بڑی خوشخبر ی

 پی ایس ایل  میں شائقین کی واپسی کے حوالے سے چیئرمین پاکستان کرکٹ بورڈ محسن نقوی نے میڈیا سے گفتگو کرتے ہوئے امید ظاہر کی ہے اور کہا ہے کہ کراؤڈ کو میدان میں واپس لانے کے لیے ہر ممکن کوشش کی جائے گی۔

انہوں نے کہا کہ موجودہ عالمی حالات اور صورتحال کو مدنظر رکھتے ہوئے وہ وزیر اعظم شہباز شریف سے اس معاملے پر بات کریں گے تاکہ تماشائیوں کی اسٹیڈیم میں واپسی کے لیے کوئی عملی حل نکالا جا سکے۔ ان کا کہنا تھا کہ شائقین کرکٹ کو میدان میں لانے کے لیے پوری کوشش جاری رہے گی۔

چیئرمین پی سی بی محسن نقوی نے کہا کہ وزیر اعظم شہباز شریف، فیلڈ مارشل اور دیگر ذمہ دار شخصیات ملک میں امن کے قیام کے لیے مشترکہ طور پر کوششیں کر رہی ہیں۔ انہوں نے کہا کہ موجودہ حالات میں پاکستان سپر لیگ کا انعقاد قانون نافذ کرنے والے اداروں کی ایک بڑی کامیابی ہے جنہوں نے بہترین انداز میں سیکیورٹی انتظامات یقینی بنائے۔

 یہ بھی پڑھیں :چیئرمین پی سی بی محسن نقوی کا قومی ٹیم کی سلیکشن کمیٹی سے متعلق بڑا فیصلہ

انہوں نے مزید کہا کہ اگر اسٹیڈیم میں تماشائیوں کو آنے کی اجازت نہ بھی ملی تو پاکستان کرکٹ بورڈ فرنچائزز کو گیٹ منی اپنی طرف سے ادا کرے گا۔ تاہم اگر تماشائیوں کو اجازت مل جاتی ہے تو پھر میچوں کے شیڈول میں کسی قسم کی تبدیلی نہیں کی جائے گی۔

چیئرمین پاکستان کرکٹ بورڈ نے بھارت کی صورتحال کا ذکر کرتے ہوئے کہا کہ وہاں پیٹرول پمپس پر لمبی قطاریں لگی ہوئی ہیں اور پیٹرول کی قلت کا سامنا ہے، جبکہ پاکستان میں اس طرح کی کوئی کمی نہیں ہے اور صورتحال بہتر ہے۔انہوں نے ان افواہوں پر بھی ردعمل دیا جو ان کے حوالے سے بین الاقوامی کرکٹ کونسل کی چیئرمین شپ سے متعلق زیر گردش تھیں۔ محسن نقوی نے کہا کہ ان پر اس کے علاوہ بھی بہت سی ذمہ داریاں ہیں اور اس طرح کی باتوں میں کوئی حقیقت نہیں۔

یہ گفتگو اس وقت سامنے آئی ہے جب پاکستان سپر لیگ کے انعقاد اور اس میں شائقین کی شرکت کے حوالے سے مختلف پہلوؤں پر غور کیا جا رہا ہے، جبکہ حکام صورتحال کو مسلسل مانیٹر کر رہے ہیں۔