چیئرمین پی سی بی محسن نقوی کا قومی ٹیم کی سلیکشن کمیٹی سے متعلق بڑا فیصلہ

پاکستان کرکٹ بورڈ کے چیئرمین محسن نقوی نے قومی سلیکشن کمیٹی کے ارکان کو یقین دہانی کرائی ہے کہ وہ اپنی ذمہ داریاں انجام دینے میں مکمل خودمختار ہوں گے اور کسی بھی قسم کے بیرونی دباؤ کو خاطر میں لائے بغیر صرف میرٹ کی بنیاد پر فیصلے کریں گے۔

چیئرمین پی سی بی نے پاکستان کرکٹ بورڈ کے ہیڈکوارٹر میں قومی سلیکشن کمیٹی کے ارکان سے ملاقات کی جس میں ٹیم کے انتخاب کے طریقہ کار، مستقبل کی حکمت عملی اور نوجوان کھلاڑیوں کو مواقع دینے سے متعلق مختلف امور پر تفصیلی تبادلہ خیال کیا گیا۔

یہ بھی پڑھیں:پی سی بی کا بڑا اقدام، سلیکشن کمیٹی میں بڑے پیمانے پراُکھاڑ پچھاڑ، کس کو کیا ذمہ داریاں ملیں؟، تفصیل آگئی

ملاقات کے دوران محسن نقوی نے سلیکشن کمیٹی کے ارکان پر بھرپور اعتماد کا اظہار کرتے ہوئے کہا کہ قومی ٹیم کے لیے بہترین اور باصلاحیت کھلاڑیوں کا انتخاب کرنا کمیٹی کی بنیادی ذمہ داری ہے۔ انہوں نے کہا کہ تمام فیصلے شفافیت، دیانتداری اور میرٹ کو مدنظر رکھتے ہوئے کیے جائیں تاکہ قومی ٹیم مزید مضبوط بن سکے۔

چیئرمین پی سی بی نے اس موقع پر واضح کیا کہ بورڈ سلیکشن کمیٹی کے فیصلوں میں کسی قسم کی مداخلت نہیں کرے گا اور ارکان کو مکمل آزادی حاصل ہوگی کہ وہ کارکردگی کی بنیاد پر کھلاڑیوں کا انتخاب کریں۔ ان کا کہنا تھا کہ مضبوط اور متوازن ٹیم بنانے کے لیے ضروری ہے کہ سلیکٹرز آزادانہ فیصلے کریں۔

انہوں نے مزید کہا کہ پاکستان کرکٹ کو مستقبل میں مزید کامیاب بنانے کے لیے نوجوان کھلاڑیوں کو زیادہ مواقع فراہم کرنا ہوں گے تاکہ نئی صلاحیتیں سامنے آ سکیں۔ ان کے مطابق ایک مضبوط ڈومیسٹک نظام اور شفاف سلیکشن کا عمل ہی قومی ٹیم کی کامیابی کی بنیاد بن سکتا ہے۔

محسن نقوی نے سلیکشن کمیٹی کو مشورہ دیا کہ وہ غیر ضروری اور غیر تعمیری تنقید کو نظر انداز کریں۔ انہوں نے کہا کہ سوشل میڈیا یا دیگر ذرائع سے ہونے والی تنقید کو اپنے فیصلوں پر اثر انداز نہیں ہونے دینا چاہیے اور صرف کھلاڑیوں کی کارکردگی کو معیار بنایا جائے۔

انہوں نے یہ بھی کہا کہ پاکستان کرکٹ بورڈ ہر اس فیصلے کی مکمل حمایت کرے گا جو پاکستان کرکٹ کے مفاد میں اور نیک نیتی سے کیا جائے گا۔ ان کے مطابق سلیکشن کمیٹی کی کارکردگی سے ہی قومی ٹیم کی مضبوطی اور مستقبل کا تعین ہوگا۔

ملاقات میں قومی سلیکشن کمیٹی کے ارکان مصباح الحق، سرفراز احمد، اسد شفیق اور عاقب جاوید بھی موجود تھے۔

سلیکشن کمیٹی کے ارکان نے چیئرمین پی سی بی کی جانب سے اعتماد کے اظہار اور مکمل خودمختاری دینے پر شکریہ ادا کیا۔ انہوں نے اس عزم کا اظہار کیا کہ وہ دیانتداری، شفافیت اور پیشہ ورانہ انداز کے ساتھ اپنی ذمہ داریاں انجام دیں گے اور ہر فیصلے میں پاکستان کرکٹ کے مفاد کو مقدم رکھیں گے۔

ارکان کا کہنا تھا کہ قومی ٹیم کے انتخاب میں کارکردگی کو اولین ترجیح دی جائے گی اور ایسے کھلاڑیوں کو منتخب کیا جائے گا جو مستقل مزاجی کے ساتھ بہتر کھیل پیش کر رہے ہوں۔

واضح رہے کہ اگر سلیکشن کے عمل میں شفافیت اور میرٹ کو یقینی بنایا جائے تو پاکستان کرکٹ کو طویل مدتی بنیادوں پر فائدہ ہو سکتا ہے اور قومی ٹیم عالمی سطح پر مزید مضبوط ہو سکتی ہے۔