سپارکو نے پاکستان میںآج چاند نظر آنے یا کل عید کے امکان کو رد کر دیا۔30روزے ہوں گے

پاکستان میں آج 29 واں رمضان المبارک ہے اور شوال کے چاند کے مشاہدے کے لیے آج شام مرکزی رویت ہلال کمیٹی کے ساتھ ساتھ مختلف ذیلی کمیٹیوں کے اجلاس بھی منعقد ہوں گے۔

 سپارکو (پاکستان اسپیس اینڈ ریسرچ آرگنائزیشن) کی نئی پیشگوئی سامنے آئی ہے۔ سپارکو کے ڈویژنل ہیڈ آسٹروفزکس غلام مصطفیٰ لغاری نے بتایا کہ نیا چاند جمعرات 19 مارچ 2026 کو صبح 6 بج کر 23 منٹ پر پیدا ہو چکا ہے۔

غلام مصطفیٰ لغاری کے مطابق آج غروب آفتاب کے وقت چاند کی عمر تقریباً 12 گھنٹے اور 41 منٹ ہوگی، جب کہ پاکستان کے ساحلی علاقوں میں غروب آفتاب اور غروب مہتاب کے درمیان تقریباً 28 منٹ کا وقفہ متوقع ہے۔

یہ بھی پڑھیں:حکومت کے چاند رات سے متعلق اہم فیصلے

سائنسی بنیادوں پر چاند کی رویت کے لیے ضروری ہے کہ چاند کی عمر کم از کم 19 گھنٹے ہو اور چاند نظر آنے کا دورانیہ 40 سے 45 منٹ کے درمیان ہو۔ اس پیشگوئی کے تناظر میں پاکستان میں آج عیدالفطر کا چاند نظر آنے کے امکانات نہ ہونے کے برابر ہیں، اور امکان ظاہر کیا جا رہا ہے کہ ملک بھر میں عیدالفطر ہفتہ 21 مارچ کو منائی جائے گی۔

واضح رہے کہ سعودی عرب اور دیگر خلیجی ممالک میں بھی بدھ کو  شوال کا چاند نظر نہیں آیا، اور وہاں عیدالفطر جمعہ 20 مارچ کو ہوگی۔