سرکاری ملازمت کے خواہشمند افراد کے لئے اہم خبر

خیبر پختونخوا حکومت نے سرکاری اداروں میں بھرتیوں کے طریقہ کار میں اہم فیصلہ کرتے ہوئے تمام جاری اور مستقل بھرتیوں میں انٹرنل ریکروٹمنٹ اور دیگر ایجنسیوں کے ذریعے تقرریوں پر مکمل پابندی عائد کر دی ہے۔

نئی پالیسی کے مطابق صوبے کے تمام محکموں میں اسامیوں پر بھرتی کا عمل اب صرف ایجوکیشن ٹیسٹنگ اینڈ ایویلوایشن اتھارٹی (ایٹا) کے ذریعے کیا جائے گا، اور کسی بھی متبادل طریقہ کار کی اجازت صرف متعلقہ سیکریٹری کی خصوصی منظوری کے بعد ممکن ہوگی۔

محکمہ لائیو اسٹاک، فشریز اور کوآپریٹو کی جانب سے جاری اعلامیے میں واضح کیا گیا ہے کہ محکمہ میں جاری تمام بھرتیوں کو فوری طور پر ایٹا کے نظام سے منسلک کیا جائے۔ مزید کہا گیا ہے کہ تمام دفاتر بھرتیوں کے اشتہارات، ٹیسٹ شیڈول، امتحانات اور نتائج کے تمام مراحل میں ایٹا کے ساتھ مکمل تعاون کریں۔

اعلامیے میں یہ بھی ہدایت دی گئی ہے کہ نئی ہدایات پر عمل درآمد کی رپورٹ سات دن کے اندر متعلقہ محکمے کو جمع کروانا لازمی ہے۔ سرکاری ذرائع کے مطابق اس فیصلے کا بنیادی مقصد بھرتیوں کے عمل میں شفافیت، میرٹ کے اصول اور مؤثر نگرانی کو یقینی بنانا ہے۔

ماہرین کا کہنا ہے کہ اس اقدام سے سرکاری بھرتیوں میں غیر ضروری مداخلت اور کسی بھی قسم کی غیر قانونی تقرری کے امکانات کم ہو جائیں گے، جبکہ امیدواروں کے لیے میرٹ کی بنیاد پر مواقع فراہم کرنے میں مدد ملے گی۔

یہ بھی پڑھیں: نادرا میں بڑے عہدوں پر ملازمت حاصل کرنے کے خواہشمند افراد کیلئے خوشخبری

نئی پالیسی کے تحت صوبے میں بھرتیوں کے تمام مراحل اب مرکزیت کے ساتھ ایٹا کے زیر نگرانی ہوں گے، جس سے بھرتیوں کا عمل منظم، شفاف اور قابل اعتماد بنایا جائے گا۔ یہ اقدام خیبر پختونخوا حکومت کی طرف سے سرکاری ملازمتوں میں اصلاحات اور میرٹ کی بحالی کے لیے ایک اہم قدم کے طور پر دیکھا جا رہا ہے۔

اس تبدیلی کے بعد صوبے کے تمام محکمے اور متعلقہ دفاتر نئی پالیسی کے تحت اپنے عمل کو مکمل طور پر ایٹا کے نظام کے مطابق ڈھالیں گے، تاکہ بھرتیوں کے تمام مراحل میں شفافیت اور قانونیت برقرار رہے۔