خیبرپختونخوا میں سیکورٹی فورسز کی دو الگ الگ کارروائیاں، بھارتی پراکسی فتنہ الخوارج کے 13 دہشتگرد ہلاک کردئیے گئے،آئی ایس پی آرکے مطابق خیبرپختونخوا کے مختلف اضلاع میں سکیورٹی فورسز نے انٹیلی جنس معلومات کی بنیاد پر دو الگ الگ کارروائیاں کیں ۔
بھارتی پراکسی فتنہ الخوارج سے تعلق رکھنے والے 13 دہشتگردوں کو ہلاک کر دیا۔ 12 اور 13 دسمبر 2025 کو موصول ہونے والی خفیہ اطلاعات پر ضلع مہمند میں انٹیلی جنس بیسڈ آپریشن کیا گیاجہاں سیکیورٹی فورسز نے خوارج کے ٹھکانے کو مؤثر انداز میں نشانہ بنایا۔
کارروائی کے دوران شدید فائرنگ کے تبادلے کے بعد سات خوارج کو جہنم واصل کر دیا گیا۔ایک اور انٹیلی جنس بیسڈ آپریشن ضلع بنوں میں کیا گیا جہاں سیکیورٹی فورسز نے کامیاب کارروائی کرتے ہوئے مزید چھ خوارج کو ہلاک کر دیا۔
ہلاک ہونے والے تمام دہشتگرد بھارتی پراکسی فتنہ الخوارج سے تعلق رکھتے تھے اور علاقے میں دہشتگردانہ سرگرمیوں میں ملوث تھے۔علاقے میں کسی بھی ممکنہ خطرے کے خاتمے کے لیے سینیٹائزیشن آپریشن جاری ہے۔
بیان میں کہا گیا کہ قومی ایکشن پلان کے تحت وفاقی ایپکس کمیٹی سے منظور شدہ وژن “عزمِ استحکام” کے تحت سیکیورٹی فورسز اور قانون نافذ کرنے والے ادارے ملک سے غیر ملکی سرپرستی میں ہونے والی دہشتگردی کے مکمل خاتمے کے لیے پُرعزم ہیں۔
پاکستان کی سکیورٹی فورسز دہشتگردی کے ناسور کے مکمل خاتمے تک اپنی کارروائیاں پوری شدت کے ساتھ جاری رکھیں گی تاکہ ملک میں امن و استحکام کو یقینی بنایا جا سکے۔
By 
