مسجد نبویؐ کے مؤذن شیخ فیصل نعمان انتقال کر گئے

مدینہ منورہ میں مسجد نبویؐ کے معروف اور ہر دل عزیز مؤذن شیخ فیصل نعمان کے انتقال کی خبر سامنے آتے ہی عالمِ اسلام میں گہرے رنج و غم کی فضا قائم ہو گئی۔

ان کی وفات پر دنیا بھر سے علما، ائمہ، نمازیوں اور عقیدت مند مسلمانوں نے افسوس کا اظہار کیا اور مرحوم کے لیے دعائے مغفرت اور درجات کی بلندی کی دعائیں کیں۔ مسجد نبویؐ سے بلند ہونے والی ان کی پُرسوز اور روح پرور اذان طویل عرصے تک مسلمانوں کے دلوں کو ایمان کی تازگی بخشتی رہی، جس کی یاد ہمیشہ زندہ رہے گی۔

تفصیلات کے مطابق مرحوم شیخ فیصل نعمان کی نمازِ جنازہ منگل کے روز فجر کی نماز کے فوراً بعد مسجد نبویؐ میں ادا کی گئی۔ نمازِ جنازہ میں علما، طلبہ، نمازیوں اور مختلف ممالک سے آئے ہوئے زائرین کی بڑی تعداد نے شرکت کی۔ جنازے کے بعد مرحوم کو اسلامی تاریخ کے عظیم اور مقدس قبرستان جنت البقیع، جسے بقیع الغرقد بھی کہا جاتا ہے، میں سپردِ خاک کر دیا گیا۔ اس موقع پر فضا سوگوار رہی اور ہر آنکھ اشکبار نظر آئی۔

شیخ فیصل نعمان نے مسجد نبویؐ میں تقریباً پچیس برس تک اذان کی عظیم اور مقدس خدمت انجام دی۔ انہیں 1422 ہجری، مطابق 2001 عیسوی میں مسجد نبویؐ کا مؤذن مقرر کیا گیا تھا۔ اس کے بعد وہ 1447 ہجری تک مسلسل اس عظیم ذمہ داری کو اخلاص، عاجزی اور وقار کے ساتھ نبھاتے رہے۔ ان کی زندگی کا بڑا حصہ مسجد نبویؐ کی خدمت اور اذان کے ذریعے اللہ کے پیغام کو بلند کرنے میں گزرا۔

یہ بھی پڑھیں: طلباء رہنما عثمان ہادی کی میت بنگلادیش پہنچادی گئی، نمازِ جنازہ سے قبل احتجاجی طلبا کا بڑا مطالبہ

مرحوم کا تعلق ایک معزز اور باوقار خاندان سے تھا، جس کی نسل در نسل خدمات مسجد نبویؐ میں اذان سے وابستہ رہی ہیں۔ یہ خاندان طویل عرصے سے اس مقدس فریضے کو انجام دیتا چلا آ رہا ہے۔ شیخ فیصل نعمان کی اذان کی آواز نہ صرف مسجد نبویؐ میں موجود نمازیوں کے دلوں کو منور کرتی تھی بلکہ دنیا بھر میں سننے والے مسلمانوں کے لیے بھی روحانی سکون اور ایمانی کیفیت کا سبب بنتی تھی۔

ان کی وفات کو عالمِ اسلام کے لیے ایک بڑا روحانی نقصان قرار دیا جا رہا ہے۔ مسلمان حلقوں میں اس بات پر اتفاق کیا جا رہا ہے کہ شیخ فیصل نعمان کی خدمات اور ان کی خوش الحان اذان کو ہمیشہ احترام اور عقیدت کے ساتھ یاد رکھا جائے گا۔