سال 2025 میں گوگل سرچ کے عالمی رجحانات نے ایک مرتبہ پھر یہ ثابت کر دیا کہ دنیا بھر کے انٹرنیٹ صارفین کن موضوعات اور کن شخصیات میں سب سے زیادہ دلچسپی لیتے رہےسیاست، ٹیکنالوجی اور تفریح نے مجموعی طور پر سرچ ٹرینڈز پر غلبہ رکھا تاہم کھیل، مذہب اور ہائی پروفائل فوجداری مقدمات بھی بعض اہم واقعات اور وائرل خبروں کے باعث نمایاں رہے۔
سرچ والیوم ڈیٹا کی بنیاد پر تازہ رپورٹ کے مطابق گزشتہ بارہ ماہ کے دوران چند مخصوص عوامی شخصیات نے عالمی سطح پر غیر معمولی آن لائن توجہ حاصل کی۔
اس فہرست میں سابق امریکی صدر ڈونلڈ ٹرمپ بدستور سرفہرست رہے، رپورٹ کے مطابق انہیں اوسطاً ماہانہ تقریباً ایک کروڑ ساٹھ لاکھ گوگل سرچز موصول ہوئیں۔
امریکی سیاست میں ان کی مسلسل موجودگی انتخابی بیانات، عدالتی معاملات اور عالمی میڈیا کوریج نے ان کی سرچ مقبولیت کو پورا سال برقرار رکھا۔
ٹرمپ کے بعد دوسرے نمبر پر معروف ٹیکنالوجی ارب پتی ایلون مسک رہےجن کی اوسط ماہانہ سرچز تقریباً ایک کروڑ دس لاکھ ریکارڈ کی گئیں۔
مصنوعی ذہانت، خلائی منصوبوں، الیکٹرک گاڑیوں اور سوشل میڈیا پلیٹ فارمز سے متعلق متنازع اور خبروں میں رہنے والے بیانات نے انہیں مسلسل عالمی توجہ کا مرکز بنائے رکھا۔دلچسپ بات یہ ہے کہ عالمی ٹاپ ٹین میں موسیقی کے شعبے کی نمایاں نمائندگی دیکھنے میں آئی، مجموعی فہرست کا تقریباً نصف حصہ گلوکاروں اور موسیقی سے وابستہ شخصیات پر مشتمل تھا۔
پاپ اسٹار ٹیلر سوئفٹ بدستور دنیا کی سب سے زیادہ سرچ کی جانے والی فنکاروں میں شامل رہیں، جبکہ سبریانا کارپنٹر اور رومیو سانتوس نے بھی ماہانہ ساٹھ سے اسی لاکھ سرچز کے ساتھ نمایاں مقام حاصل کیا۔فلم اور ٹیلی ویژن کا شعبہ بھی سرچ کے میدان میں کسی سے پیچھے نہیں رہا، ٹاپ 100 سب سے زیادہ سرچ کی جانے والی شخصیات میں سب سے بڑا حصہ اسی شعبے کا رہا۔
عالمی سطح پر اسٹریمنگ پلیٹ فارمز کی تیز رفتار مقبولیت، نئی سیریز اور فلموں کی ریلیز نے اداکاروں اور ہدایت کاروں کو مسلسل خبروں میں رکھا، جس کا براہِ راست اثر گوگل سرچ ٹرینڈز پر بھی دکھائی دیا۔کھیلوں کے میدان میں اگرچہ مجموعی نمائندگی تفریح اور سیاست کے مقابلے میں کم رہی، تاہم چند بڑے نام عالمی توجہ حاصل کرنے میں کامیاب رہے۔
پرتگالی فٹبال اسٹار کرسٹیانو رونالڈو بدستور سب سے زیادہ سرچ کیے جانے والے کھلاڑیوں میں شامل رہے، جبکہ نوجوان ہسپانوی فٹبالر لامین یامال نے عالمی ٹاپ ٹین میں جگہ بنا کر ابھرتے ہوئے ٹیلنٹ میں عوامی دلچسپی کو نمایاں کیا۔
سال 2025 کے سرچ رجحانات میں عالمی سیاست، مذہبی قیادت اور ہائی پروفائل فوجداری مقدمات نے بھی اہم کردار ادا کیا۔
مذہبی شعبے میں پوپ فرانسس سب سے زیادہ سرچ کی جانے والی شخصیت رہے جبکہ بعض مقدمات کو مسلسل میڈیا کوریج کے باعث غیر معمولی سرچ والیوم حاصل ہوا۔
قومیت کے لحاظ سے تجزیہ ظاہر کرتا ہے کہ عالمی سرچ دلچسپی کا بڑا حصہ امریکی عوامی شخصیات کے گرد مرکوز رہا۔ ٹاپ 100 میں شامل امریکی شخصیات کو مجموعی طور پر اوسطاً ماہانہ 23 کروڑ 70 لاکھ سے زائد سرچز ملیں، جو برطانیہ، کینیڈا اور آسٹریلیا کو ملا کر بھی زیادہ ہیں۔عالمی ٹاپ ٹین میں شامل دس میں سے چھ شخصیات کا تعلق امریکا سے تھا، جو امریکی میڈیا اور سیاست کی عالمی رسائی کو واضح کرتا ہے۔
اعداد و شمار کے مطابق ٹاپ 100 سب سے زیادہ سرچ کی جانے والی شخصیات میں فلم و ٹیلی ویژن کا حصہ 36 فیصد، موسیقی کا 28 فیصد اور کھیل کا 16 فیصد رہا۔ مجموعی فہرست میں مردوں کا تناسب 56 فیصد تھا، تاہم تفریح، فیشن اور شاہی خاندان سے متعلق سرچز میں خواتین کی نمایاں نمائندگی دیکھنے میں آئی۔
By 
