فٹبال کے عالمی سپر اسٹار لیونل میسی کو اکیسویں صدی کا بہترین ایتھلیٹ قرار دے دیا گیا ہے۔
میڈیا رپورٹ کے مطابق کینیڈا کے معروف اخبار لی ژورنال دے کیوبک کی جانب سے جاری کی گئی باوقار عالمی درجہ بندی میں میسی نے تمام کھیلوں کے نامور ستاروں کو پیچھے چھوڑتے ہوئے پہلی پوزیشن حاصل کی۔
یہ فہرست اکیسویں صدی کے ابتدائی پچیس برس مکمل ہونے پر مرتب کی گئی، جس میں مختلف کھیلوں سے تعلق رکھنے والے 25 عظیم کھلاڑیوں کو شامل کیا گیا۔
درجہ بندی کے مطابق امریکی فٹبال لیجنڈ ٹام بریڈی دوسرے جبکہ اولمپکس کی تاریخ کے سب سے کامیاب ایتھلیٹ، امریکی تیراک مائیکل فیلپس تیسرے نمبر پر رہے۔
خواتین ٹینس کی عظیم کھلاڑی سرینا ولیمز چوتھے، دنیا کے تیز ترین انسان یوسین بولٹ پانچویں اور باسکٹ بال سپر اسٹار لیبرون جیمز چھٹے نمبر پر براجمان رہے۔
میسی کے دیرینہ حریف اور پرتگال کے فٹبال اسٹار کرسٹیانو رونالڈو اس فہرست میں دسویں نمبر پر رہے ہیں، ان سے آگے ٹینس اسٹار نوواک جوکووچ، اولمپک جمناسٹ سیمون بائلز اور آنجہانی باسکٹ بال لیجنڈ کوبی برائنٹ کو شامل کیا گیا۔
فہرست میں کھیلوں کے دیگر عظیم ناموں میں ٹائیگر ووڈز، راجر فیڈرر، رافیل نڈال، اسٹیفن کری، لیوس ہیملٹن، مائیکل شوماخر، شوہے اوہتانی اور مارٹا بھی شامل ہیں۔
یاد رہے کہ لیونل میسی اس وقت امریکی کلب انٹر میامی اور ارجنٹائن کی قومی ٹیم کے کپتان ہیں، انہوں نے 2022 میں قطر میں منعقدہ فٹبال ورلڈ کپ جیت کر اپنے شاندار کیریئر کا سب سے بڑا خواب پورا کیا۔
میسی نے رواں ماہ انٹر میامی کو کلب کی تاریخ کی پہلی میجر لیگ سوکر چیمپئن شپ بھی دلائی، جہاں انہیں گولڈن بوٹ اور مسلسل ایم وی پی ایوارڈز سے نوازا گیا۔
کلب فٹبال میں میسی نے بارسلونا کے ساتھ 10 مرتبہ لا لیگا اور 4 بار یوئیفا چیمپئنز لیگ جیتی، جبکہ پیرس سینٹ جرمین کے ساتھ بھی نمایاں کامیابیاں حاصل کیں۔
By 
