پاکستان سے شکست کے خوف میں مبتلا بھارت نے اپنی مسلح افواج کی صلاحیتوں میں اضافے کے لیے ایک بڑی پیش رفت کرتے ہوئے تقریباً 8.8 ارب ڈالر مالیت کی دفاعی خریداری کی تجاویز کی منظوری دے دی ہے۔
بھارتی وزارت دفاع کے مطابق ڈیفنس ایکوزیشن کونسل ’ڈی اے سی‘ نے پیر کو جدید دفاعی آلات کی خریداری سے متعلق متعدد اہم تجاویز کو باضابطہ طور پر منظور کیا، جن کی مجموعی مالیت 790 ارب بھارتی روپے بنتی ہے۔
وزارت دفاع کی جانب سے جاری بیان میں کہا گیا ہے کہ یہ منظوری بھارت کے اسٹریٹجک دفاعی انفراسٹرکچر میں ایک بڑی سرمایہ کاری کی نمائندگی کرتی ہے۔ ان معاہدوں کا مقصد آرمی، نیوی اور ایئر فورس کی جدید کاری کو یقینی بنانا اور تینوں افواج کے درمیان آپریشنل ہم آہنگی کو مزید بہتر بنانا ہے۔
عالمی میڈیا کے مطابق یہ خریداری تینوں افواج تک پھیلی ہوئی ہے، جس کے تحت متحدہ اپ گریڈ کا عمل مکمل کیا جائے گا۔ منظور شدہ پیکیج میں خاص طور پر مواصلات اور صورتحال سے آگاہی کے نظام پر توجہ مرکوز کی گئی ہے، جو جدید جنگی تقاضوں کے لیے انتہائی اہم تصور کیے جاتے ہیں۔
منظور کیے گئے اہم دفاعی آلات میں جدید ریڈار سسٹمز شامل ہیں، جن کا مقصد نگرانی اور ابتدائی وارننگ کی صلاحیتوں کو مضبوط بنانا ہے۔ اس کے علاوہ ہائی ٹیک ریڈیوز کی خریداری بھی منظور کی گئی ہے، جو پیچیدہ اور مشکل ماحول میں محفوظ اور مؤثر مواصلات کو یقینی بنائیں گے۔
اسی طرح خودکار ٹیک آف اور لینڈنگ ’اے ٹول‘ ریکارڈنگ سسٹمز کی منظوری بھی دی گئی ہے، جن سے پرواز کی حفاظت، درستگی اور فضائی آپریشنز کی مجموعی کارکردگی میں بہتری آئے گی۔
وزارت دفاع کے مطابق یہ وسیع مالی عزم حکومت کی اس پالیسی کی عکاسی کرتا ہے جس کے تحت ملکی دفاعی پیداوار کو فروغ دینے اور تکنیکی خود انحصاری بڑھانے پر زور دیا جا رہا ہے۔ جدید آلات سے لیس افواج کے ذریعے نہ صرف سرحدی سلامتی کو مضبوط بنایا جائے گا بلکہ فورسز کے درمیان رابطہ اور تعاون بھی بہتر ہوگا۔
دفاعی ماہرین کے مطابق یہ اعلان سال کے اہم ترین دفاعی سنگ میلوں میں شمار کیا جا رہا ہے، جو بدلتے ہوئے علاقائی سلامتی کے منظرنامے میں بھارت کو اپنی دفاعی حکمت عملی مزید مضبوط بنانے میں مدد دے گا۔
By 
