ٹیلی نار صارفین کےلئے اہم خبر

پاکستان ٹیلی کمیونی کیشن کمپنی لمیٹڈ (پی ٹی سی ایل) نے ملک کے ٹیلی کام شعبے میں ایک تاریخی سنگِ میل عبور کرتے ہوئے ٹیلی نار پاکستان اور اورین ٹاورز (Orion Towers) کے جاری شدہ سو فیصد حصص کی خریداری کا عمل مکمل کر لیا ہے۔

اس اقدام کے نتیجے میں پی ٹی سی ایل نے باضابطہ طور پر ٹیلی نار پاکستان کا انتظام سنبھال لیا ہے، جس سے پاکستان میں ڈیجیٹل اختیارات اور جدت کے ایک نئے دور کا آغاز ہو گیا ہے۔

اب ٹیلی نار پاکستان اور اورین ٹاورز پی ٹی سی ایل کی مکمل ملکیتی ذیلی کمپنیوں کے طور پر خدمات انجام دیں گے۔ یہ کمپنیاں پاک ٹیلی کام موبائل لمیٹڈ (یوفون 4G) اور یو مائیکروفنانس بینک کے ساتھ شانہ بشانہ کام کریں گی۔ عبوری مدت کے دوران ٹیلی نار پاکستان ایک علیحدہ قانونی ادارے کے طور پر اپنی خدمات جاری رکھے گا، اور ضروری ریگولیٹری منظوریوں کے بعد مستقبل میں اسے پی ٹی ایم ایل کے ساتھ ضم کر کے ایک مربوط ادارہ تشکیل دیا جائے گا۔

اس موقع پر پی ٹی سی ایل نے ٹیلی نار اے ایس اے کی پاکستان کے ٹیلی کام شعبے کی ترقی میں خدمات کو سراہتے ہوئے کہا کہ تقریباً دو دہائیوں تک ٹیلی نار نے ایک کاروباری مقابل اور شراکت دار ادارے کی حیثیت سے سروس کے معیار کو بلند کرنے اور رابطوں کو فروغ دینے میں نمایاں کردار ادا کیا ہے۔

یہ بھی پڑھیں: آئی سی سی نے پلیئرز کی نئی رینکنگ جاری کر دی،ٹاپ ٹین میں کتنے پاکستانی شامل؟

پی ٹی سی ایل کے مطابق اس سنگِ میل کے بعد دونوں ادارے ایک دوسرے کی صلاحیتوں اور وسائل کی تکمیل کریں گے، اور صارفین کی سہولت، وسیع تر رسائی اور تیز رفتار جدت پر مبنی ایک مضبوط پلیٹ فارم قائم کریں گے۔

مستقبل میں پی ٹی ایم ایل (یوفون 4G) اور ٹیلی نار پاکستان کے انضمام سے وجود میں آنے والی کمپنی نیٹ ورک کی صلاحیتوں میں توسیع، اسپیکٹرم وسائل کی بہتر ترتیب، اور صارفین کی بدلتی ہوئی ضروریات کے مطابق محفوظ، مربوط اور ڈیجیٹل طور پر فعال خدمات فراہم کرنے کے لیے مکمل طور پر تیار ہوگی۔