باجوڑ میں شہید ہونے والے میجر عدیل زمان کی نمازِ جنازہ پشاور میں ادا، فیلڈ مارشل سید عاصم منیر کی شرکت

خیبر پختونخوا کے ضلع باجوڑ کے علاقے خار میں فتنہ الخوارج کے خلاف بہادری سے لڑتے ہوئے جامِ شہادت نوش کرنے والے میجر عدیل زمان شہید کی نمازِ جنازہ آج پشاور گیریژن میں ادا کی گئی۔

شہید کی نمازِ جنازہ میں چیف آف ڈیفنس اسٹاف و چیف آف آرمی اسٹاف فیلڈ مارشل سید عاصم منیر ، وفاقی وزیر داخلہ، کمانڈر پشاور کور، اعلیٰ عسکری و سول افسران اور عوام کی بڑی تعداد نے شرکت کی۔

آئی ایس پی آر کے مطابق نمازِ جنازہ کے موقع پر فیلڈ مارشل سید عاصم منیر نے میجر عدیل زمان شہید کی عظیم قربانی کو زبردست خراجِ عقیدت پیش کیا۔ انہوں نے کہا کہ پاکستان آرمی کے شہداء قوم کا فخر ہیں اور ان کی قربانیاں ہمیشہ یاد رکھی جائیں گی۔ فیلڈ مارشل نے دعا کی کہ اللہ تعالیٰ شہید کے درجات جنت میں بلند فرمائے اور ان کے اہلِ خانہ کو صبر و استقامت عطا کرے۔

میجر عدیل زمان شہید نے دورانِ آپریشن فرنٹ سے قیادت کرتے ہوئے اپنی جان قربان کی۔ انہوں نے اپنے فرائض کی انجام دہی کے دوران دشمن کا دلیرانہ مقابلہ کیا اور مادرِ وطن کے دفاع میں عظیم مثال قائم کی۔

یہ بھی پڑھیں: باجوڑ میں سیکیورٹی فورسز کا آپریشن، بھارتی حمایت یافتہ 5 خوارج ہلاک

آئی ایس پی آر کے مطابق پاکستان کی مسلح افواج ملک سے دہشت گردی کے ناسور کے مکمل خاتمے کے لیے پرعزم ہیں اور اس طرح کی قربانیاں قوم کے حوصلے اور عزم کو مزید مضبوط کرتی ہیں۔

نمازِ جنازہ کے بعد بتایا گیا کہ میجر عدیل زمان شہید کو پورے فوجی اعزاز کے ساتھ ان کے آبائی شہر ڈیرہ اسماعیل خان میں سپردِ خاک کیا جائے گا، جہاں فوجی اعزازات کے ساتھ تدفین کی جائے گی۔

بعد ازاں فیلڈ مارشل سید عاصم منیر نے سی ایم ایچ پشاور کا دورہ کیا، جہاں انہوں نے آپریشن کے دوران زخمی ہونے والے افسران اور جوانوں کی عیادت کی۔ فیلڈ مارشل نے زخمی اہلکاروں کی جرات، بہادری اور ثابت قدمی کو سراہا اور ان کے بلند حوصلے کی تعریف کی۔ انہوں نے اس عزم کا اعادہ کیا کہ قوم اپنی مسلح افواج کے ساتھ کھڑی ہے اور دہشت گردی کے خلاف جنگ ہر صورت جاری رکھی جائے گی۔