سیکیورٹی فورسز نے ضلع باجوڑ میں خفیہ اطلاعات کی بنیاد پر ایک مؤثر آپریشن کیا، جس کے دوران بھارتی حمایت یافتہ پانچ خوارج کو ہلاک کر دیا گیا۔ بیان کے مطابق یہ آپریشن دہشت گردوں کی موجودگی کی اطلاع ملنے پر کیا گیا، جس کا مقصد علاقے میں سرگرم خوارج کے ٹھکانوں کو نشانہ بنانا تھا۔
آئی ایس پی آر کا کہنا ہے کہ آپریشن کے دوران سیکیورٹی فورسز اور خوارج کے درمیان شدید فائرنگ کا تبادلہ ہوا۔ اس فائرنگ کے دوران میجر عدیل زمان دشمن کا بہادری سے مقابلہ کرتے ہوئے شہید ہو گئے۔ میجر عدیل زمان نے مادرِ وطن کے دفاع میں اپنی جان کا نذرانہ پیش کیا اور آخری دم تک دشمن کے خلاف ڈٹے رہے۔
آئی ایس پی آر کے مطابق سیکیورٹی فورسز نے پیشہ ورانہ مہارت اور عزم کے ساتھ دہشت گردوں کے ٹھکانوں کو نشانہ بنایا، جس کے نتیجے میں پانچ بھارتی حمایت یافتہ خوارج مارے گئے۔ آپریشن کے دوران دہشت گردوں کے نیٹ ورک کو شدید نقصان پہنچایا گیا۔
آئی ایس پی آر کے مطابق علاقے میں کلیئرنس اور سرچ آپریشن بھی کیا گیا تاکہ کسی بھی ممکنہ خطرے کا مکمل طور پر خاتمہ یقینی بنایا جا سکے۔ سیکیورٹی فورسز اس عزم کا اعادہ کرتی ہیں کہ ملک سے دہشت گردی کے مکمل خاتمے تک کارروائیاں جاری رہیں گی۔
شہید میجر عدیل زمان کی قربانی کو خراجِ عقیدت پیش کرتے ہوئے آئی ایس پی آر نے کہا کہ شہداء کی قربانیاں قوم کے لیے قابلِ فخر ہیں اور ان کی بدولت پاکستان کے امن و استحکام کو یقینی بنایا جا رہا ہے۔ سیکیورٹی فورسز اور قوم دہشت گردی کے خلاف جنگ میں شہداء کے مشن کو ہر قیمت پر جاری رکھنے کے لیے پرعزم ہیں۔
By 
