پی ٹی آئی اکاؤنٹس سے فوجی افسر کے کورٹ مارشل کی جھوٹی خبر سوشل میڈیا پر وائرل، ملکی اداروں کو بدنام کرنے کی سازش

پاکستانی فوج کے ایک افسر ’کیپٹن عمران علی‘ کے مبینہ کورٹ مارشل سے متعلق وائرل سوشل میڈیا پوسٹ کو بڑے پیمانے پر جھوٹی خبر قرار دے دیا گیا ہے، کیونکہ اس دعوے کے حق میں کوئی شواہد سامنے نہیں آ سکے، جس کے بعد اسے ایک سیاسی جماعت کی جانب سے پھیلایا جانے والا جھوٹا پروپیگنڈا قرار دیا گیا ہے۔

جمعرات یکم جنوری 2026 کو سوشل میڈیا پلیٹ فارم ایکس (سابقہ ٹوئٹر) پر پی ٹی آئی کے حمایت یافتہ بھگوڑے یوٹیوبر شہباز گلِ کی ایک ویڈیو سامنے آئی ہے ، جسے اس نے جیوپولیٹکس اور دفاع سے متعلق ایک اکاؤنٹ سے شیئر کیا ہے۔ ویڈیو میں اردو زبان میں ایک نیوز بلیٹن کے طرز پر تیار کردہ ویڈیو شامل ہے، جس میں شہباز گل نے دعویٰ کیا ہے کہ مذکورہ افسر نے 26 نومبر 2024 کو اسلام آباد میں پی ٹی آئی کے مظاہرین کے ساتھ جھڑپوں کے دوران فائرنگ کے احکامات ماننے سے انکار کیا، جس پر اسے گرفتار کر کے سزا دی گئی۔

یہ بھی پڑھیں:عمران ریاض،عادل راجہ ،صابر شاکر، شہزاد اکبر، شہباز گل فوج مخالف بیانہ بناکر بھارت کو خوش کررہے، مزمل سہروردی

آزاد فیکٹ کی تحقیق کے مطابق معتبر میڈیا اداروں، سرکاری فوجی ذرائع اور انٹر سروسز پبلک ریلیشنز (آئی ایس پی آر) کے بیانات کی جامع جانچ پڑتال میں نہ تو کسی ایسے کورٹ مارشل کی تصدیق ہوئی اور نہ ہی ’کیپٹن عمران علی‘ نامی کسی افسر کے وجود کا کوئی ثبوت ملا ہے۔

Capitan Imran Ali court Marshall pic.twitter.com/ikQUi1fAso

— THE UNKNOWN MAN (@Theunk13) January 1, 2026

فیکٹ چیکنگ سے وابستہ اکاؤنٹس آزاد فیکٹ چیک نے فوری طور پر اس کہانی کو جھوٹا قرار دیتے ہوئے کہا کہ ایک ویڈیو اور بے ترتیب خود ساختہ تصویر اور جعلی دستاویزات کے ذریعے جعلی اور جھوٹی خبر پھیلائی گئی ہے۔

Fact Checked. https://t.co/k2sInaZ1ik

— Azaad Fact Check (@azaadfactcheck) January 1, 2026

تجزیہ کاروں کے مطابق یہ دعویٰ سابق وزیراعظم عمران خان کی گرفتاری کے بعد جاری سیاسی کشیدگی کے تناظر میں پی ٹی آئی سے وابستہ سوشل میڈیا اکاؤنٹس پر گردش کرنے والی غیر مصدقہ افواہوں کا حصہ ہے۔ سیکیورٹی ماہرین نے خبردار کیا ہے کہ اس نوعیت کی غلط معلومات معاشرتی تقسیم کو مزید گہرا اور ادارہ جاتی اعتماد کو نقصان پہنچا سکتی ہیں۔

مزید پڑھیں:ریاستی بیانیہ سب پر بھاری: منصور علی خان کے 2 کروڑ ویوز، جاوید چوہدری کا گراف بھی بلند، عمران ریاض، شہباز گل، معید پیرزادہ تنزلی کا شکار

تاحال نہ تو پاکستان آرمی اور نہ ہی حکومت کی جانب سے اس الزام پر کوئی تبصرہ سامنے آیا ہے، جبکہ اس کہانی کے حق میں کوئی مستند ثبوت بھی فراہم نہیں کیا جا سکا تاہم اس ویڈیو کو پاکستان تحریک انصاف (پی ٹی آئی) کے اکاؤنٹس سے شیئر کیا جا رہا ہے۔

واضح رہے سیاسی مبصرین پی ٹی آئی کی جانب سے اس طرح کی جعلی، من گھڑت اور بے بنیاد خبروں کو پھیلانے کے عمل کو ملک دشمنی اور اداروں کو بدنام کرنے کی سازش قرار دے رہے ہیں۔