تہران کے پاور گرڈ پر بڑا حملہ: دارالحکومت کے کئی علاقے اندھیرے میں ڈوب گئے

ایران کے دارالحکومت تہران اور پڑوسی صوبے البرز میں بجلی کی اہم تنصیبات کو نشانہ بنایا گیا ہے جس کے نتیجے میں دونوں صوبوں کے متعدد علاقوں میں بجلی کی فراہمی معطل ہوگئی۔

ایرانی وزارتِ توانائی کے مطابق، رات گئے ہونے والے ان حملوں میں مشرقی تہران کا ایک پاور ٹرانسمیشن سب اسٹیشن مکمل طور پر تباہ ہو گیا، جبکہ البرز کے شہر کرج کے باہر ایک بڑا بجلی کا کھمبہ گولہ باری (شارپنل) کی زد میں آیا۔

اس اچانک بریک ڈاؤن نے تہران اور اس کے شمال مغربی علاقوں میں معمولاتِ زندگی کو عارضی طور پر متاثر کیا۔

نائب وزیرِ توانائی مصطفیٰ رجبی مشہدی نے سرکاری ٹی وی پر صورتحال کی وضاحت کرتے ہوئے بتایا کہ کرج میں بجلی کے جال پر شیل لگنے سے ترسیل کا نظام متاثر ہوا، تاہم انہوں نے شہریوں کو اطمینان دلایا کہ گھبرانے کی ضرورت نہیں ہے۔

مزید پڑھیں:تہران اور اس کے نواح میں امریکہ اور اسرائیل کے حملے جاری

فارس نیوز ایجنسی کی تازہ ترین رپورٹ کے مطابق، تہران اور کرج کے بیشتر متاثرہ علاقوں میں بجلی کی فراہمی بحال کر دی گئی ہے۔

وزارتِ توانائی کی فنی ٹیمیں ان علاقوں میں بھی ہنگامی بنیادوں پر کام کر رہی ہیں جہاں اب بھی تعطل موجود ہے تاکہ پورے گرڈ کو جلد از جلد مکمل فعال کیا جا سکے۔