اسلام آباد پولیس نے تحریک انصاف کے رکن قومی اسمبلی کو گرفتار کرلیا

اسلام آباد پولیس نے 26 نمبر چونگی سے تحریک انصاف کے رکن اسمبلی انور تاج کو حراست میں لے لیا ہے۔

وزیراعلیٰ خیبر پختونخوا سہیل آفریدی تاحال 26 نمبر چونگی پر موجود ہیں، جبکہ پی ٹی آئی رہنما عاطف خان نے سینئر پولیس حکام سے بات چیت کی ہے۔

راستہ کھولنے سے متعلق پی ٹی آئی قیادت اور پولیس کے درمیان مذاکرات جاری ہیں۔ 26 نمبر چونگی بند ہونے کے باعث ٹیکسلا جی ٹی روڈ پر ٹریفک کا دباؤ بڑھ گیا ہے۔

اسلام آباد انتظامیہ نے جی ٹی روڈ پر کنٹینرز لگا کر سڑک بند کر دی ہے، جس کے نتیجے میں ٹریفک جام میں کئی ایمبولینسز بھی پھنس گئی ہیں۔

پولیس نے ایم این اے انور تاج کو حراست میں لینے کے بعد قیدی وین میں بٹھا دیا۔ وزیراعلیٰ خیبر پختونخوا کا قافلہ اب تک چونگی پر موجود ہے، جبکہ پولیس نے غیر متعلقہ افراد کو علاقے سے ہٹا دیا ہے۔

یہ بھی پڑھیں: پاکستان میں پیٹرول گاڑیوں کا دور ختم؟ ایم جی نے سب سے سستی الیکٹرک گاڑی لانچ کردی، قیمت جان کر آپ بھی دنگ رہ جائیں گے

اس سے قبل وزیراعلیٰ سہیل آفریدی کو چونگی نمبر 26 پر روکا گیا تھا۔ اسلام آباد پولیس کے دستے اور رینجرز کی ٹیمیں چونگی پر موجود ہیں، جبکہ دونوں اطراف کنٹینرز لگا دیے گئے ہیں۔

شہریوں نے 26 نمبر چونگی کے قریب اپنی مدد آپ کے تحت رکاوٹ ہٹا کر راستہ کھول دیا۔

دوسری جانب ایئرپورٹ سے آنے والی سڑک پر کھڑی عارضی رکاوٹ بھی شہریوں نے ہٹا دی ہے۔ اس وقت ایئرپورٹ کی طرف جانے والے راستے پر ٹریفک کا شدید دباؤ ہے۔