ملک بھر کے عوام کے لیے ایک اور بڑی خوشخبری سامنے آگئی جہاں پٹرولیم مصنوعات کی قیمتوں میں مسلسل تیسری بار کمی کا امکان ظاہر کیا جا رہا ہے، جس کے بعد شہریوں کو مہنگائی کے دباؤ سے کچھ ریلیف ملنے کی امید پیدا ہوگئی ہے۔
میڈیا رپورٹس کے مطابق ذرائع کا کہنا ہے کہ آج پٹرولیم مصنوعات کی ہفتہ وار نئی قیمتوں کا تعین کیا جائے گا اور ابتدائی اطلاعات یہی ہیں کہ اس بار بھی پٹرول اور ڈیزل سستا ہونے جا رہا ہے۔ خاص طور پر ہائی اسپیڈ ڈیزل کی قیمت میں نمایاں کمی متوقع ہے، جس پر عوام کی نظریں جمی ہوئی ہیں۔
پٹرول اور ڈیزل کتنا سستا ہوگا؟
ذرائع کا کہنا ہے کہ اس مرتبہ پٹرولیم مصنوعات کی قیمتوں میں بڑی کمی کی جاسکتی ہے، امکان ظاہر کیا گیا ہے کہ پٹرول کی قیمت میں 8 روپے فی لیٹر جبکہ ہائی اسپیڈ ڈیزل کی قیمت میں 30 روپے فی لیٹر تک کمی ہوسکتی ہے۔
عالمی مارکیٹ میں خام تیل اور پٹرولیم مصنوعات کی قیمتوں میں کمی کے بعد حکومت پر عوام کو ریلیف دینے کا دباؤ بڑھ گیا تھا، اسی لیے اب عوام کو براہ راست فائدہ پہنچانے کی تیاری کی جا رہی ہے۔
عوام کو کتنا فائدہ ہوگا؟
اگر پٹرول اور ڈیزل کی قیمتوں میں یہ کمی نافذ ہوتی ہے تو اس کے اثرات صرف ٹرانسپورٹ تک محدود نہیں رہیں گے بلکہ روزمرہ استعمال کی کئی اشیا بھی سستی ہوسکتی ہیں۔
خاص طور پر ٹرانسپورٹ کرایوں، سبزیوں، پھلوں اور دیگر ضروری سامان کی قیمتوں میں کمی آنے کی امید ہے۔ سوشل میڈیا پر بھی شہری اس خبر پر خوشی کا اظہار کررہے ہیں اور کئی لوگ اسے حالیہ مہنگائی میں “بڑا ریلیف” قرار دے رہے ہیں۔
حتمی فیصلہ کب ہوگا؟
ذرائع کے مطابق پاکستان میں پٹرولیم مصنوعات کی قیمتوں کا حتمی فیصلہ وزیراعظم شہباز شریف کریں گے جبکہ نئی قیمتوں کا باضابطہ اعلان پٹرولیم ڈویژن کی جانب سے کیا جائے گا۔
نئی قیمتیں ایک ہفتے کے لیے نافذ العمل ہوں گی۔ اب عوام کو صرف سرکاری اعلان کا انتظار ہے۔
کیا مزید کمی کا بھی امکان ہے؟
معاشی ماہرین کا کہنا ہے کہ اگر عالمی مارکیٹ میں خام تیل کی قیمتیں اسی طرح کم رہیں تو آنے والے دنوں میں پٹرولیم مصنوعات کی قیمتوں میں مزید کمی کے امکانات بھی موجود ہیں، تاہم عالمی سیاسی صورتحال اور ڈالر کی قدر آئندہ قیمتوں کے تعین میں اہم کردار ادا کریں گی۔
By 
