سرائے صالح کے قریب آئل ٹینکر اور دو کاروں میں تصادم، ایبٹ آباد سے واپس آنے والے دوست حادثے کا شکار ہوگئے
ہری پور کے علاقے سرائے صالح کے قریب آئل ٹینکر اور دو کاروں کے درمیان خوفناک تصادم میں چار نوجوان جاں بحق جبکہ دو افراد زخمی ہوگئے۔ حادثے میں جانیں گنوانے والے چاروں نوجوانوں کا تعلق ہری پور کے ایک ہی محلے سے تھا۔
ذرائع کے مطابق دونوں کاروں میں سوار افراد آپس میں دوست تھے۔ وہ ایبٹ آباد میں کھانا کھانے کے بعد ہری پور واپس آرہے تھے کہ سرائے صالح کے قریب حادثے کا شکار ہوگئے۔
ابتدائی اطلاعات کے مطابق ایک کار آئل ٹینکر سے ٹکرا گئی۔ اس کے بعد دوسری کار بھی بے قابو ہوکر ٹینکر سے جا ٹکرائی۔
تصادم کے نتیجے میں چار نوجوان جاں بحق اور دو افراد زخمی ہوگئے۔ جاں بحق نوجوانوں میں 23 سالہ عمر مہتاب، 28 سالہ شامیر جاوید، 19 سالہ سیف الرحمان اور 25 سالہ احسن شاہ شامل ہیں۔
چاروں نوجوانوں کا تعلق ہری پور کے درویش محلہ کھجوراں والے سے تھا۔
By 
