ایران جوہری ہتھیار حاصل نہیں کرسکتا، ہر صورتحال سے نمٹنے کیلئے تیار ہیں، امریکی وزیر جنگ

سنگاپور میں میڈیا سے گفتگو کرتے ہوئے امریکی وزیر جنگ پیٹ ہیگستھ نے کہا ہے کہ ایران کسی صورت جوہری ہتھیار حاصل نہیں کرسکتا اور امریکا ہر ممکن صورتحال سے نمٹنے کے لیے مکمل طور پر تیار ہے۔

پیٹ ہیگستھ کا کہنا تھا کہ ایران بخوبی جانتا ہے کہ معاہدے تک پہنچنے کے لیے اسے کیا اقدامات کرنا ہوں گے، جبکہ ایران کے ساتھ ہونے والے مذاکرات مثبت رہے ہیں۔

انہوں نے واضح کیا کہ ایران سے متعلق امریکی اہداف میں کوئی تبدیلی نہیں آئی اور جو بھی معاہدہ ہوگا، وہ اچھا اور مؤثر معاہدہ ہوگا۔

امریکی وزیر جنگ نے کہا کہ صدر ڈونلڈ ٹرمپ امریکی مفادات کو مدنظر رکھتے ہوئے حتمی فیصلہ کریں گے۔

یہ بھی پڑھیں: ایک طرف مذاکرات، دوسری جانب امریکا کا ایران پر بڑا معاشی وار

پیٹ ہیگستھ نے پاکستان کو امریکا کا مخلص دوست قرار دیتے ہوئے دوطرفہ تعلقات کی اہمیت پر زور دیا۔

انہوں نے کہا کہ امریکا چاہتا ہے کہ آبنائے ہرمز بغیر کسی رکاوٹ یا اضافی محصولات کے کھلا رہے اور ایران کو آبنائے ہرمز کو پہلے کی طرح بحری آمدورفت کے لیے کھولنا ہوگا۔

امریکی وزیر جنگ نے مزید کہا کہ چینی وزیر دفاع کے ساتھ ان کی بات چیت مفید رہی، جبکہ یوکرین کی مدد کے لیے یورپی اتحادیوں کے ساتھ ہر ممکن تعاون جاری رکھا جائے گا۔