نادرا کا شاندار اقدام، گھر کی دہلیز پر رجسٹریشن اور شناختی کارڈ کا حصول ممکن ہوگیا

وزیراعلی بلوچستان میرسرفراز بگٹی نے صوبے بھر میں 21 نادرا مراکز اور 6 موبائل رجسٹریشن وین کا افتتاح کر دیا۔

اس موقع پر نائب وزیراعظم و وزیر خارجہ اسحاق ڈار اور سپیکر قومی اسمبلی ایاز صادق ،وزیر کامرس جام کمال خان، ڈائریکٹر جنرل نادرا بلوچستان ریجن، انتظامیہ کے افسران اور دیگر معززین بھی موجود تھے۔

مزید پڑھیں: حکومت کا پاسپورٹ قوانین میں ترمیم کا فیصلہ

نائب وزیر اعظم اسحاق ڈار کی جانب سے صوبے کی ترقی کے لئے نادرا کی کوششوں کا خیرمقدم کیا گیا ۔پشین، لورا لائی اور خضدار میں خواتین کے لئے خصوصی مراکز قائم کر دئیے گئے،نادرا سنٹر فریدآباد، دشت یہ گورن، بالاناڑی، باباکوٹ، لاکھڑا، کنگری، جائین پروم، اور ھیردین نے بھی کام شروع کر دیا،لوئی، گشکور، گدر، تلا، شہید مہرآباد، پنجپائی، نانا صاحب، کرک جا، مانجھی پور اور لوئی بند میں بھی نادرا مراکز قائم کیئے گئے ہیں۔

نادرا کے مطابق نادرا مراکز کے لئے ان علاقوں کا انتخاب کیا گیا ہے جہاں شہریوں کو رجسٹریشن سہولیات کی اشد ضرورت تھی، جن دورافتادہ علاقوں میں انٹرنیٹ دستیاب نہیں وہاں موبائل رجسٹریشن وین کے ذریعے سہولیات فراہم کی جائیں گی،جدید سہولیات سے آراستہ موبائل رجسٹریشن وین پر سیٹلائٹ کے ذریعے انٹرنیٹ کی سہولت میسر ہے،موبائل رجسٹریشن وین کی بدولت دورافتادہ علاقوں کے مکین اپنے گھر کے قریب شناختی دستاویزات بنوا سکتے ہیں۔