پی ٹی آئی کے عزیز اللہ گران کی رکنیت ختم

پی ٹی آئی رہنما عزیز اللہ گران کی رکنیت ختم کر دی گئی۔

پی ٹی آئی کے صوبائی صدر علی امین گنڈاپور نے عزیز اللہ گران رکنیت ختم کرنے کی منظوری دیدی۔ جنرل سیکرٹری پی ٹی آئی خیبر پختونخوا علی اصغر خان کے دستخط کے بعد باقاعدہ نوٹیفکیشن جاری کر دیا گیا۔

مزید پڑھیں: تحریک انصاف بطور سیاسی جماعت تسلیم، انٹرپارٹی انتخابات منظور نہ کیے گئے، الیکشن کمیشن نے فہرست جاری کر دی

دوسری جانب الیکشن کمیشن آف پاکستان نے رجسٹرڈ سیاسی جماعتوں کی نئی تازہ فہرست جاری کر دی جس میں پاکستان تحریک انصاف کو بطور سیاسی جماعت تسلیم کر لیا گیا۔

نئی فہرست کے مطابق الیکشن کمیشن میں 166 سیاسی جماعتیں رجسٹرڈ ہیں، الیکشن کمیشن نے مسلم لیگ ن کے انٹراپارٹی انتخابات تسلیم کرلیے۔ الیکشن کمیشن کاکہنا ہے کہ میاں نواز شریف مسلم لیگ ن کے صدر ہیں، میاں نواز شریف بلامقابلہ مسلم لیگ ن کے صدر منتخب ہوئے تھے۔ الیکشن کمیشن نے جماعت اسلامی کے انٹرا پارٹی الیکشن بھی تسلیم کر لیے، الیکشن کمیشن نے کئی سیاسی جماعتوں کے نئے پارٹی صدر یا چیئرمین کے نام بھی اپ ڈیٹ کر دیئے۔

الیکشن کمیشن نے تحریک انصاف کو سیاسی جماعت تسلیم کرلیا، تحریک انصاف تاحال رجسٹرڈ سیاسی جماعتوں کی فہرستوں میں موجود ہے ، تحریک انصاف بغیر صدارت سیاسی جماعتوں کی فہرست میں شامل ہے ، تحریک انصاف کے انٹرا پارٹی انتخابات تاحال الیکشن کمیشن نے منظور نہیں کئے۔ تحریک انصاف انٹرا پارٹی انتخابات کا کیس تاحال زیر التوا ہے اور انٹرا پارٹی انتخابات نہ ہونے کے باعث بلے کے انتخابی نشان سے محروم ہے۔

نئی فہرست میں پاکستان تحریک انصاف کے پارٹی چیئرمین کا نام تاحال اپ ڈیٹ نہیں کیا گیا، الیکشن کمیشن نے میاں نواز شریف کا نام بطور صدر مسلم لیگ ن اپ ڈیٹ کر دیا جبکہ جماعت اسلامی کے امیر نعیم الرحمان خان کا نام بطور پارٹی سربراہ اپ ڈیٹ ہوگیا۔ اسی طرح محمود خان کا نام بطور چیئرمین پاکستان تحریک انصاف پارلیمنٹیرین نئی فہرست میں شامل ہوگیا جبکہ صدر مملکت آصف علی زرداری کا نام بطور صدر پاکستان پیپلز پارٹی پارلیمنٹیرین موجود ہے۔

نئی فہرست میں بلاول بھٹو زرداری کا نام بطور چیئرمین پاکستان پیپلز پارٹی شامل ہے اور اسفندیار ولی خان کا نام تاحال بطور صدر عوامی نیشنل پارٹی موجودہے۔ الیکشن کمیشن کی نئی فہرست میں پاک سر زمین پارٹی کانام بھی رجسٹرڈ جماعتوں میں شامل ہے۔