By پاکستان کے بڑے شہروں کے لیے ڈینگی الرٹ جاری کر دیا گیا ہے۔
تفصیلات کے مطابق صحت حکام نے مون سون کے بعد کے موسم میں 20 ستمبر سے 5 دسمبر 2024 تک ممکنہ ڈینگی پھیلنے کی وارننگ دی ہے۔ موسمی حالات خاص طور پر زیادہ نمی اور بارش، ڈینگی مچھر کی افزائش کے لیے موزوں ماحول فراہم کر رہے ہیں۔ محکمہ موسمیات کے مطابق ڈینگی کا خطرہ اُس وقت بڑھتا ہے جب درجہ حرارت 26 سے 29 ڈگری سینٹی گریڈ اور نمی کی سطح 60 فیصد سے زیادہ ہو۔ یہ صورتحال تین سے پانچ ہفتے تک برقرار رہ سکتی ہے۔
یہ بھی پڑھیں: ڈالر مزید سستا، 100 انڈیکس بلندیوں کو چھو گیا
اگر متاثرہ علاقوں میں 27 ملی میٹر سے زیادہ بارش ہوتی ہے تو ڈینگی پھیلنے کا خدشہ مزید بڑھ جاتا ہے۔ ڈینگی مچھروں کی سرگرمی کا عروج سورج طلوع ہونے کے دو گھنٹے بعد اور غروب آفتاب سے دو گھنٹے پہلے ہوتا ہے۔متاثرہ شہر، جن میں ڈینگی کا خطرہ موجود ہے، میں کراچی، لاہور، پشاور، راولپنڈی، اسلام آباد، حیدرآباد، فیصل آباد، سیالکوٹ، لاڑکانہ اور ملتان شامل ہیں۔
مون سون بارشوں سے متاثرہ علاقوں میں بھی الرٹ جاری کیا گیا ہے۔ صحت حکام نے تمام متعلقہ اداروں سے کہا ہے کہ وہ پیشگی اقدامات کریں تاکہ اس وبا پر قابو پایا جا سکے۔ڈینگی کنٹرول مراکز اور قومی صحت کی ایجنسیوں کو صورتحال کی نگرانی کی ہدایت کی گئی ہے۔ عوام سے اپیل کی گئی ہے کہ وہ حفاظتی تدابیر اختیار کریں، کھڑے پانی سے بچیں اور مچھر کے کاٹنے سے خود کو محفوظ رکھیں تاکہ ڈینگی کے پھیلاؤ کو روکا جا سکے۔
