ایم کیو ایم کا حکومت سے ترامیم کی حمایت کے بدلے بڑا مطالبہ

متحدہ قومی موومنٹ (ایم کیو ایم) پاکستان نے 26 ویں آئینی ترمیم کیلئے حکومتی ترامیم کی حمایت کے بدلے میں اپنا مطالبہ حکومت کے سامنے پیش کردیا۔ جس پر بات چیت کے لیے حکومتی وفد آج کراچی پہنچ گیا ہے۔

ذرائع کے مطابق ایم کیو ایم، جو وفاق میں حکومت کی اتحادی ہے، نے 26 ویں آئینی ترامیم کی منظوری کے لیے اہم مطالبہ پیش کیا ہے۔ انہوں نے ملک بھر کے بلدیاتی اداروں کو اختیارات دینے کا مطالبہ کیا ہے۔ ایم کیو ایم کے وفد نے گزشتہ روز وزیراعظم شہباز شریف سے ملاقات کی تھی، جس میں انہوں نے آرٹیکل 140 اے کی ترمیم کے حوالے سے جمع شدہ مسودہ بھی پیش کیا۔

یہ بھی پڑھیں: چیف جسٹس پاکستان کی تقرری 3سال کیلئے، ریٹائرمنٹ کی عمر 68 سال ہو گی ؟حکومتی آئینی مسودہ

اس معاملے پر وزیراعظم کی ہدایت پر مسلم لیگ ن کا وفد ایم کیو ایم کے مرکزی الیکشن آفس پہنچ گیا۔ اس وفد کی قیادت وفاقی وزیر احسن اقبال کر رہے ہیں، جبکہ اس میں اعظم نذیر تارڑ اور رانا ثنا اللہ بھی شامل ہیں۔ ن لیگی وفد کے ایم کیو ایم مرکز پہنچنے پر خالد مقبول، امین الحق، حفیظ الدین، شکیل احمد، علی خورشیدی اور دیگر نے ان کا استقبال کیا۔

اب سے کچھ دیر بعد دونوں جماعتوں کے درمیان پاکستان ہاؤس میں ملاقات ہوگی، جس میں ایم کیو ایم کی طرف سے خالد مقبول، کامران ٹیسوری، فاروق ستار اور مصطفیٰ کمال شریک ہوں گے۔ اس ملاقات میں بلدیاتی اداروں سے متعلق مسودے پر گفتگو کی جائے گی۔ ذرائع نے بتایا کہ ن لیگ کا وفد آئینی ترمیم کے موجودہ مسودے پر ایم کیو ایم قیادت کو اعتماد میں لے گا۔