پی ٹی آئی احتجاج ، راولپنڈی میں شاہراؤں پر رکاوٹیں لگا دی گئیں

پاکستان تحریک انصاف کی بعد نماز جمعہ ملک بھر میں ضلعی سطح پر احتجاج کی کال کے تناظر میں راولپنڈی میں مختلف شاہراؤں پر رکاوٹیں کھڑی کر کے بند کر دیا گیا ہے۔

پشاور روڈ پر چیئرنگ کراس کے قریب اور نال روڈ پر ایم ایچ کے قریب سڑک کے دونوں جانب رکاوٹیں لگائی گئی ہیں، تاہم شاہراؤں پر ایک لائن ٹریفک کے لیے کھلی رکھی گئی ہے۔ لیاقت باغ سے فیض آباد تک مری روڈ پر کنٹینرز پہنچا دیے گئے ہیں اور مری روڈ کی جانب آنے والے مختلف راستوں کو بند کر دیا گیا ہے۔ راولپنڈی کے داخلی راستوں پر بھی زیگ زیگ پکٹس قائم کر کے پولیس نفری تعینات کی گئی ہے۔ مریڑھ چوک اور لیاقت باغ کی جانب جانے والے راستے بند ہیں، جبکہ سواں پل پر سنگل لائن ٹریفک کو آنے اور جانے کی اجازت ہے۔

راولپنڈی کے دیگر تمام راستے معمول کے مطابق کھلے ہیں۔ جڑواں شہروں راولپنڈی اور اسلام آباد میں میڑو بس سروس پانچویں روز بھی بند ہے۔ میڑو بس سروس کا آپریشن شنگھائی تعاون تنظیم کانفرنس کے دوران سیکیورٹی کے پیش نظر 14 سے 16 اکتوبر تک بند رکھا گیا، اور 17 اکتوبر کو بھی سروس بند رہی، جبکہ آج جمعے کو بھی یہ سروس معطل ہے۔