انسداد دہشتگردی عدالت نے تحریک انصاف کے 43 کارکنوں کی ضمانتیں منظور کر لیں

28 ستمبر اور 5 اکتوبر کو تحریک انصاف کی جانب سے کیے جانے والے احتجاج کے دوران تھانہ وارث خان اور تھانہ ٹیکسلا سے گرفتار 43 کارکنوں کی ضمانتیں منظور کر لی گئیں۔

راولپنڈی کی انسداد دہشت گردی عدالت کے جج امجد شاہ نے محفوظ فیصلہ سناتے ہوئے تھانہ وارث خان سے گرفتار 3 کم عمر بچوں حسنیں، زین العابدین اور احمد کو مقدمہ سے ڈسچارج کر دیا۔ ان تینوں بچوں کی ہتھکڑیاں کھلوا کر انہیں رہا کر دیا گیا۔ عدالت نے باقی کارکنان کو تیس تیس ہزار روپے کے مچلکے جمع کرانے کا حکم دیا۔

مزید پڑھیں: بانی پی ٹی آئی کی اہلیہ بشریٰ بی بی کی پشاور ہائیکورٹ میں راہداری ضمانت

دوسری جانب 28 ستمبر کو پی ٹی آئی کے احتجاج کے دوران گرفتار 3 خواتین کارکنان کی ضمانتیں بھی منظور کر لی گئی ہیں۔ ہائی کورٹ راولپنڈی بنچ کے جج جسٹس صداقت خان اور جسٹس مرزا وقاص راؤف نے ان خواتین کی ضمانتیں منظور کیں اور تینوں خواتین کارکنان نصرت، فرحت اور حسینہ کو پچاس پچاس ہزار روپے کے مچلکے جمع کرانے کا حکم دیا۔