حکومت پنجاب کا پی آئی اے خریدنے کا کوئی ارادہ نہیں، عظمیٰ بخاری

صوبائی وزیر اطلاعات و نشریات عظمیٰ بخاری نے واضح کیا کہ حکومت پنجاب کا پاکستان انٹرنیشنل ایئر لائنزخریدنے کا کوئی ارادہ نہیں۔

تفصیلات کے مطابق صوبائی وزیر عظمیٰ بخاری نے کہا ہے کہ حکومت پنجاب کا پی آئی اے کی خریداری کا کوئی ارادہ نہیں البتہ ایئر پنجاب کے معاملے پر بات چیت ہوئی تھی۔

عظمیٰ بخاری نے مزید کہا کہ پاکستان کو ایک اچھی ایئر لائن کی ضرورت ہے۔ لوگوں نے میاں صاحب سے شکایت کی ہے کہ خوار ہو کر پاکستان آنا پڑتا ہے۔ اگر صوبے چاہیں تو اپنی ایئر لائن شروع کر سکتے ہیں۔

مزید پڑھیں: ہم قومی ائیرلائنز کو سستے داموں نہیں بیچنے دیں گے، وزیراعلیٰ خیبرپختونخوا

انہوں نے وزیراعلیٰ خیبرپختونخوا کے بیان پر تنقید کرتے ہوئے کہا کہ عجیب بات ہے کہ اربوں روپےکا مقروض صوبہ خیبرپختونخوا بھی پی آئی اے خریدنے کی بات کر رہا ہے۔ پی آئی اے میں اڑنے والے جہاز ہوتے ہیں دوسرے نہیں۔ آپ دوسرے اداروں کو تو پیسے نہیں دے پا رہے۔

عظمیٰ بخاری نے یہ بھی بتایا کہ ہماری حکومت پنجاب کے اخراجات پہلے ہی کنٹرول میں ہیں۔ پنجاب میں کوئی اخراجات کا مسئلہ نہیں اور یہاں کینسر ہسپتال تعمیر ہو رہا ہے۔

صوبہ پنجاب میں کسان کارڈ کے ذریعے کسانوں کی مدد کی جا رہی ہے، مریضوں کو ادویات فراہم کی جارہی ہیں اور بچوں کو الیکٹرک بائیکس دی جا رہی ہیں۔