پاکستان کا مقامی الیکٹرو آپٹیکل سیٹلائٹ لانچ ملکی خلائی سفر میں ایک اہم سنگ میل ہے، آئی ایس پی آر

آئی ایس پی آر کا کہنا ہے کہ پاکستان کا مقامی الیکٹروآپٹیکل سیٹلائٹ لانچ ملکی خلائی سفر میں ایک اہم سنگ میل ہے، ای او ون سیٹلائٹ پاکستان کے مختلف شعبوں میں فائدہ مند ہے۔

واضح رہے کہ پاکستان نے مقامی سطح پر تیار کیا گیا الیکٹرو آپٹیکل سیٹلائٹ خلا میں بھیج دیا ہے۔

آئی ایس پی آر کے مطابق سیٹلائٹ سے زراعت میں فصلوں کی نگرانی کی جاسکے گی۔ سیٹلائٹ سے آبپاشی کی ضروریات کا اندازہ لگا کر پیداوار کی پیشگوئی کی جاسکے گی، سیٹلائٹ غذائی تحفظ کے اقدامات، شہری ترقی کی منصوبہ بندی اور شہری پھیلاؤ کو منظم کرنے میں مدد کرے گا۔

پاک فوج کے شعبہ تعلقات عامہ کے مطابق سیٹلائٹ ماحولیاتی نگرانی اور ڈیزاسٹر منیجمنٹ، سیلاب، لینڈ سلائیڈنگ، زلزلوں، جنگلات کی کٹائی اور زمین کے کٹاؤ سے متعلق بروقت اپ ڈیٹ فراہم کرے گا۔

قدرتی آفات کی پیشگی اطلاع اور ماحولیاتی نگرانی کے لیے یہ اہم قدم  ہے، اس سے معدنیات، تیل، گیس اور پانی کے وسائل کی نگرانی ممکن ہو سکے گی، یہ سیٹلائٹ قومی خلائی پالیسی کے اہداف کیساتھ خلائی ٹیکنالوجی کی صلاحیتوں میں اضافے کیلیے تیار کیا گیا۔