190 ملین پاؤنڈ کیس فیصلہ جلد ختم ہو جائے گا ، اسی لیے اہمیت نہیں دے رہے: سلمان اکرم راجہ

رہنما پاکستان تحریک انصاف سلمان اکرم راجہ کا کہنا ہے کہ 190 ملین پاؤنڈ کیس کا فیصلہ چند ہفتوں میں ختم ہو جائے گا اس لیے اہمیت نہیں دے رہے۔

تفصیلات کے مطابق مرکزی رہنما پاکستان تحریکِ انصاف سلمان اکرم راجہ نے نجی ٹی وی پروگرام میں گفتگو کرتے ہوئے کہا ہے کہ 190 ملین پاؤنڈ کیس میں اسی قسم کے فیصلے کی توقع تھی، بیانیہ بنایا گیا کہ بانی پی ٹی آئی عمران خان نے اختیارات کا غلط استعمال کیا لیکن فیصلے میں یہ کہاں کہا گیا؟

سلمان اکرم راجہ نے کہا کہ این سی اے معاہدے میں کہیں نہیں لکھا کہ رقم ریاست کو ملنی چاہیے، رقم منتقلی سے متعلق حکومت پاکستان کا کوئی عمل دخل ہی نہیں ہے، کابینہ میں جو کچھ بھی ہوا رقم اس سے پہلے ہی آ رہی تھی، رقم برطانوی قانون کے مطابق سپریم کورٹ کے اکاؤنٹ میں آ رہی تھی، رقم سپریم کورٹ کے اکاؤنٹ میں آئی اور پھر نیب کو آگاہ کیا گیا، سپریم کورٹ کی جانب سے نیب کو کہا گیا کہ رقم سے متعلق کیا کرنا ہے۔

پی ٹی آئی رہنما نے کہا کہ مقدمہ پراسیکیوشن نے ثابت کرنا تھا ہمیں گواہ پیش کرنے کی ضرورت نہیں تھی، 190 ملین پاؤنڈ کیس کے فیصلے کو چیلنج کریں گے، عوام کی عدالت میں بھی واقعات بیان کرتے رہیں گے، فیصلہ آنے کے بعد بھی مذاکرات جاری رہیں گے، آئندہ چند ہفتے میں اس فیصلے کو اعلیٰ عدلیہ اڑا دے گی۔

انہوں نے کہا کہ ملک کی اہم سیاسی شخصیت کے ساتھ اس قسم کا کھلواڑ کیا جا رہا ہے، جوڈیشل کمیشن نہیں بنتا تو بانی پی ٹی آئی عمران خان سے آگے کیلیے رائے لیں گے، آج شاہد خاقان عباسی، محمود اچکزئی سمیت دیگر رہنماؤں سے ملاقات ہوئی، آئین و قانون کے تحفظ کیلیے تمام سیاسی جماعتوں کو ساتھ لے کر چلیں گے۔

سلمان اکرم راجہ کا کہنا تھا کہ مولانا فضل الرحمان سے بھی بات کریں گے ان کی اپنی ایک رائے ہے لیکن اسمبلی کی سطح پر ساتھ ہیں، اس وقت کون گارنٹی دے سکتا ہے جو 9 فروری کو ہوا وہ دوبارہ نہیں ہوگا، ایسی گارنٹی کیلیے ہمیں عوام کو ساتھ ملا کر چلنا ہوگا، 9 فروری کو جو ہوا دوبارہ ہوگا تو کوئی مستقبل میں کسی بات پر یقین نہیں کرے گا۔