عدالتی فیصلے سے پی ٹی آئی کا دوغلاپن سامنے آگیا ، احسن اقبال

وفاقی وزیر منصوبہ بندی و ترقی احسن اقبال نے کہا ہے کہ عمران خان کےخلاف عدالتی فیصلے سے پی ٹی آئی کی منافقت کھل کر سامنے آگئی ہے۔

تفصیلات کے مطابق اسلام آباد سے جاری کیے گئے اپنے ایک بیان میں احسن اقبال نے کہا کہ افسوسناک اور شرمناک ہے کہ پی ٹی آئی کے حامی اپنے لیڈر کی واضح کرپشن کا دفاع کر رہے ہیں۔ ان کے خیال میں بانی پی ٹی آئی نے اپنی پوری سیاسی مہم کو’’کرپشن کارڈ‘‘کے گرد بنایا، انہوں نے شفافیت اور احتساب کے وعدوں پر لوگوں کو اپنی طرف مائل کیا۔

یہ بھی پڑھیں:نواز شریف اور فیملی کو دھمکیاں دینے پر گرفتار پی ٹی آئی کارکن گلفام کیانی رہا

وفاقی وزیر کا کہنا ہے کہ بانی تحریک انصاف کے خلاف عدالتی فیصلے سے پارٹی کا دوغلاپن اور منافقت کھل کر سامنے آگئی ہے، ریاستی فنڈز کو ذاتی مقاصد کےلئے منتقل کر نے کا جرم ناقابل معافی ہے۔ انہوں نے کہا کہ 190 ملین پاؤنڈز کیس صرف مالی بدعنوانی تک محدود نہیں بلکہ عوامی اعتماد کے ساتھ دھوکا بھی ہے 28 جولائی 2022 کو فنانشل ٹائمز نے ایک رپورٹ شائع کی جس میں بانی پی ٹی آئی کو بے نقاب کیا گیا تھا ۔

یہ بھی پڑھیں:آزاد کشمیر کے رہائشیوں کیلئے شناختی کارڈ پالیسی میں کوئی تبدیلی نہیں ہوئی، نادرا

احسن اقبال نے کہا کہ پی ٹی آئی کے لوگوں نے اپنے لیڈر کے 190 ملین پاؤنڈ سکینڈل پر آنکھیں بند کررکھی ہیں، حقائق ناقابل تردید ہیں، این سی اے نے رقم پاکستان کو واپس لوٹائی۔ انہوں نے کہا کہ یہ رقم قومی خزانے میں عوامی فائدے کےلئے جمع ہونا تھی، اس کے بدلے بانی پی ٹی آئی نے ذاتی فوائد حاصل کئے۔ وفاقی وزیر کا یہ بھی کہنا تھا کہ رپورٹ میں خیراتی فنڈز کو سیاسی مہم کیلئے استعمال کرنے کی کرپشن کو بے نقاب کیا گیا ہے ۔