علی امین عہدے سے فارغ، جنید اکبر صوبے کے صدر مقرر

پاکستان تحریک انصاف (پی ٹی آئی) کے بانی عمران خان کی ہدایات پر علی امین گنڈاپور کو پارٹی کی صوبائی صدارت سے ہٹا دیا گیا ہے۔

ذرائع کے مطابق عمران خان نے وزیراعلیٰ خیبرپختونخوا علی امین گنڈاپور سے پارٹی کا عہدہ واپس لے کر ان کی جگہ جنید اکبر کو صوبے کا نیا صدر مقرر کر دیا ہے۔ عمران خان نے پی ٹی آئی کے سیکرٹری جنرل سلمان اکرم راجہ کو جنید اکبر کی تقرری کا نوٹیفکیشن جاری کرنے کی ہدایت بھی دی ہے۔ مزید برآں عمران خان نے سلمان اکرم راجہ کو پنجاب میں پارٹی کی تنظیم نو کے لیے مشاورت کرنے کی ہدایات دی ہیں۔

اس حوالے سے سلمان اکرم راجہ نے کہا کہ علی امین خود بھی چاہتے تھے کہ وہ پارٹی صدارت نہ رکھیں، اور بانی پی ٹی آئی نے انہیں مشورہ دیا تھا کہ وہ صوبے میں دہشت گردی اور گورننس کے معاملات پر توجہ مرکوز کریں۔

ذرائع کے مطابق عمران خان نے خیبرپختونخوا میں کرپشن پر اپنے تحفظات کا اظہار کرتے ہوئے علی امین کو پیغام دیا ہے کہ وہ ڈیرہ اسماعیل خان کی سیاست سے باہر آئیں۔