پی ٹی آئی رہنمائوں کا بیرسٹر گوہر کیخلاف عمران خان کو خط لکھنے کا فیصلہ

پاکستان تحریک انصاف کی پارلیمانی پارٹی کے ارکان نے عمران خان کو خط لکھنے کا فیصلہ کرلیا۔

ذرائع کے مطابق پارلیمانی پارٹی ارکان پارٹی چئیرمین بیرسٹر گوہر کے خلاف عمران خان کو خط لکھیں گے۔ پارلیمانی رہنماؤںنے بیرسٹر گوہر پر پارٹی مفادات کے برعکس فیصلوں کا الزام عائد کیا۔ پارٹی گروپ میں ارکان نے بیرسٹر گوہر کے پارلیمانی امور پر تحفظات کا اظہار کیا۔

مزید پڑھیں: ناکامی کا خدشہ یا کچھ اور۔۔؟ پی ٹی آئی صوابی جلسہ کیلئے مانیٹرنگ کمیٹیاں قائم

ذرائع کا کہنا ہے کہ تحریک انصاف کے ایم این اے ڈاکٹر امجد خان نے بیرسٹر گوہر پر سوالات اٹھائے۔ ڈاکٹر امجد خان نے صحت کی مفت سہولیات کا بل قائمہ کمیٹی میں پیش کیا تھا، ارکان نے الزام عائد کیا کہ بیرسٹر گوہر نے پارٹی کے رکن کے بل کی مخالفت کی۔ ڈاکٹر امجد نے پنجاب اور خیبرپختونخوا اسمبلی سے قرارداد پاس کروانے کی کوشش کی۔ ڈاکٹر امجد نے آصفہ بھٹو زرداری سمیت ن لیگ قیادت سے بھی بل پر رابطہ کیا تھا۔

ڈاکٹر امجد خان نے کہا کہ میرا بل تیار ہوا لیکن پارٹی چئیرمین نے ہی بل کے خلاف آواز بلند کی۔ بیرسٹر گوہر خان پر چنگیز خان کاکڑ کی جانب سے بھی تحفظات کا اظہار کیاگیا۔ چنگیز خان کاکڑ نے الزام عائد کیا کہ میرا فیصل آباد میں ہائیکورٹ کا بل تھا تاہم اپنے ہی چیئرمین نے مخالفت کی۔ انہوں نے کہا کہ پارٹی کے رکن بل لاتے ہیں اوربیرسٹر گوہر اس کی مخالفت کر دیتے ہیں۔

اس خط میں بیرسٹر گوہر کے پارلیمانی رہنماؤں سےمشاورت نہ کرنے پر عمران خان کو آگاہ کیا جائے گا۔خط کے حوالےسے ڈاکٹر امجد خان نے موقف اختیار کیا کہ یہ ہماری پارٹی کا اندورنی معاملہ ہے اس پر بات نہیں کرنا چاہتا۔جبکہ چنگیز خان کاکڑ نے کہا کہ بیرسٹر گوہر کے ساتھ ایک بل کے حوالے سے غلط فہمی ہوئی تھی، وہ دور ہو گئی ہے۔

چئیرمین پی ٹی آئی بیرسٹر گوہر نے کہا کہ پارلیمانی پارٹی کے چند ارکان کے تحفظات درست نہیں۔ پرائیویٹ ممبر بل آئیں تو ذاتی رائے دی جاتی ہے۔ ان معاملات پر قانون سازی کی ضرورت نہیں۔ پرائیویٹ ممبر بل پر مرضی کے ووٹ دیتے ہیں۔ لطیف کھوسہ اور میں نےمخالفت کی تھی۔