اللہ پاکستان کو امن، ترقی اور قوم کو اتحاد و اتفاق کی دولت سے نوازے، وزیراعظم

شہباز شریف نے عیدالاضحیٰ کے موقع پر ملک کی اعلیٰ حکومتی، آئینی اور سیاسی شخصیات سے ٹیلیفونک رابطے کیے اور انہیں عید کی مبارکباد پیش کی۔
تفصیلات کے مطابق وزیراعظم نے صدر مملکت، پنجاب، بلوچستان اور خیبر پختونخوا کے گورنرز، قومی اسمبلی کے اسپیکر، اور پنجاب، سندھ، بلوچستان اور گلگت بلتستان کے وزرائے اعلیٰ سے الگ الگ رابطہ کیا اور عید کی خوشیوں پر نیک تمناؤں کا اظہار کیا۔

اس کے علاوہ وزیراعظم نے مختلف سیاسی جماعتوں کے رہنماؤں سے بھی گفتگو کی جن میں استحکام پاکستان پارٹی کے چیئرمین، بلوچستان عوامی پارٹی کے رہنما اور قومی عوامی پارٹی کے سربراہ شامل تھے، ان رابطوں میں باہمی خیرسگالی، قومی یکجہتی اور سیاسی ہم آہنگی کے فروغ پر زور دیا گیا۔

یہ بھی پڑھیں :وزیر اعظم کا فیلڈ مارشل ،ایئر چیف اور نیول چیف کو ٹیلی فون،عید کی مبارکباد دی

وزیراعظم نے دعا کی کہ اللہ تعالیٰ پاکستان کو امن، ترقی، خوشحالی اور استحکام عطا فرمائے اور قوم کو اتحاد و اتفاق کی دولت سے نوازے، انہوں نے کہا کہ قومی مفاد کے معاملات پر تمام سیاسی و آئینی اداروں کو ایک دوسرے کے ساتھ تعاون اور رابطے کو مزید مضبوط بنانا چاہیے تاکہ عوامی مسائل کے حل میں بہتری لائی جا سکے۔

گفتگو کے دوران ملک کی مجموعی سیاسی صورتحال پر بھی تبادلۂ خیال کیا گیا، وزیراعظم نے اس بات پر زور دیا کہ وفاقی حکومت تمام صوبوں اور وفاقی اکائیوں کے ساتھ مل کر عوام کو زیادہ سے زیادہ ریلیف فراہم کرنے کے لیے عملی اقدامات جاری رکھے ہوئے ہے۔
انہوں نے کہا کہ موجودہ حالات میں قومی یکجہتی اور ادارہ جاتی ہم آہنگی نہایت ضروری ہے تاکہ ملک کو درپیش معاشی اور انتظامی چیلنجز سے مؤثر انداز میں نمٹا جا سکے۔

رابطوں کے دوران تمام رہنماؤں نے بھی عید کی مبارکباد پیش کی اور ملک کی ترقی، استحکام اور جمہوری تسلسل کے لیے نیک خواہشات کا اظہار کیا۔