محکمہ ابتدائی و ثانوی تعلیم خیبر پختونخوا نے صوبے بھر کے تمام سرکاری اور نجی تعلیمی اداروں کے لیے موسمِ گرما کی تعطیلات کا باقاعدہ اعلان کر دیا ہے۔
محکمے کی جانب سے اس حوالے سے باضابطہ نوٹیفکیشن بھی جاری کر دیا گیا ہے، جس میں صوبے کے مختلف علاقوں کے لیے اسکولوں کی بندش کا شیڈول جاری کیا گیا ہے۔
نوٹیفکیشن کے مطابق گرم علاقوں میں قائم پرائمری اسکولز یکم جون سے 31 اگست تک مکمل بند رہیں گے، جبکہ مڈل، ہائی اور ہائر سیکنڈری اسکولوں میں موسمِ گرما کی تعطیلات 15 جون سے 16 اگست تک ہوں گی۔
سرد علاقوں میں واقع تعلیمی اداروں میں موسمِ گرما کی سالانہ تعطیلات یکم جولائی سے 31 جولائی تک ہوں گی۔
نوٹیفکیشن میں واضح کیا گیا ہے کہ میدانی علاقوں کے اسکولوں میں جون 2026ء کے دوران سمر کیمپس کا سلسلہ جاری رہے گا، جس کے لیے محکمے نے سخت اوقاتِ کار اور طریقہ کار وضع کیا ہے۔
سمر کیمپ کی کلاسز پیر سے جمعرات تک منعقد ہوں گی۔ پرائمری اور مڈل اسکولوں کے لیے کلاسز صبح 7 بجے سے 9 بجے تک ہوں گی، جبکہ ہائی اور ہائر سیکنڈری کلاسز صبح 9 بج کر 40 منٹ تک جاری رہ سکیں گی۔
پرائمری اسکول کے طلبہ کو انگلش، جنرل سائنس، جنرل نالج، ریاضی اور اردو پڑھائی جائے گی، جبکہ مڈل اسکول کے طلبہ انگلش، ریاضی، جنرل سائنس اور اردو کی کلاسز لیں گے۔
ہائی اور ہائر سیکنڈری کلاسز کے لیے سائنس اور آرٹس، یعنی ہومینیٹیز، کے مضامین کو سمر کیمپ کے شیڈول میں الگ سے شامل کیا گیا ہے۔
محکمہ تعلیم کے مطابق اسکولوں کے سربراہان طلبہ کی تعلیمی ضروریات کو مدنظر رکھتے ہوئے مضامین اور کلاس کے دورانیے میں ردوبدل کرنے کے مجاز ہوں گے، تاہم کسی بھی صورت میں اسکول کی روزمرہ سرگرمیاں صبح 10 بجے سے آگے نہیں بڑھائی جا سکتیں۔
نوٹیفکیشن میں یہ بھی واضح کیا گیا ہے کہ انٹرمیڈیٹ کے طلبہ کو صرف ان دنوں سمر کیمپ سے استثنیٰ حاصل ہوگا جن دنوں تعلیمی بورڈز کے تحت ان کے پریکٹیکل امتحانات جاری ہوں گے۔
By 
